Arogotemi lokti tebilemtsü atema inyaktsüla

Kohima, November 19 (TYO) : Arogo tesayuba aser mapa naprongla nung temelenshi nüngdaker, anungji Nagaland nung aliba Arogotemi loktiliba-rongsenkettsüng tebilemtsütem aser Naga lokti indang onüktem atema lenmang bushia inyaktsüla, ta Social Worker & NBCC peace committee züngsem, Niketu Iralu-i ashi.

Bodhbar nü Dimapur Ao Baptist Church (DABA) nung ‘The Direction of the Church: A Laitys Perspective’ onük nung jembidang Niketu Iralu-i, “Arogoi mangatetba mesüra tanela nung lulaba mesüra alima tatalokbatem junga masadangtetba ajanga lokti tebilemtsütem atema Arogoi acha-ayanga inyakba nung tamakok ngura, tarutsü putu nung nüburtemi Khristan tamangba yimsü sentoktsüsa akümtsü akok” ta tekümdangtsü o ashi.

Naga nungertemi Khristan yimsü agizükba aser akhi sobaliba tamangba melenshia yimsü tasenba agizükbaji tejangja, ajisüaka tebang agi Khristan ta ayimtenba aser loktiliba na tetsüngdaji tulu lir, ta paisa metetdaktsü.

Lokti tebilemtsü onüktem nung Arogo tebang aibaji ashishiteper, ajisüaka  iba ama tensa ka nung Arogoji acha-ayanga lenmang bushitetertem asütsüla, ta Iralu-i odiodia Laishirtem, loktiliba atema inyakertem aser lanurtem ayongzüka jembi.