Osangkakettem nem tenokdangba agütsübaji ACAUT Nagaland-i aitsür

Dimapur, Nov. 19 (TYO): Oct. 25, 2015 nü Colonel General Staff, Colonel Rajesh Gupta-i osangkakettem nem temetetdaktsüba ka agütsüba atema ACAUT Nagaland-i kanga tebilemtsü katsür aser sashia aitsür, ta tanü ACAUT Nagaland, Media Cell-i sangdong ka ajanga ashi.
Iba ya osangkakettem sademsadema inyakba nokdangtsü merangba lir aser democracy nung tongshi pezübuba (Press) ta India linüki nüma tangtetba anema odia inyakba lir, ta ACAUT Nagaland-i aitsü.
Sadokasadoka jembitsü aser osangkaketji democracy tentet ajak nung tamentaktak lir, yimtenren nung sadoka o melemtepra nüburtem shisaliokn makar, anungji sorkar maparen junga inyakyimtsü atema ibaji nüngdaker.
India Temzüng okila kübok Naga nunger atema sadoka jembitsü temeten lir.
Universal Declaration of Human Rights (UDHR) kübok Arrla 19 nung sadoka jembitsü temeten lateta aliba nung osangkaket densema lir aser iba Arrla ajanga, “Pei tebilemba sademsadema jembitsü atema nisung ajak dak temeten lir, iba nungji tenokdangba kecha makai pei tebilemba jembitsü temeten agüja lir aser media mashi ka nungi osang bushitsü, angutsü aser proktsü densema lir.”
‘Freedom of press’ nung onük asem lir aser itemji- osangtsüsang ajak angutsü, osangtsüsang adoktsü aser osangtsüsang proktsü (osangkaket/kakettem nung) temeten lir, anungji osangkakettem nem iba temetettsü agütsübaji odiodia democracy anema inyakba lir, ta kasa sangdong ajangasa ashi.