Arogotemi Yoga indang junga bushitsüla: SPANY

Aizawl, June 13 (Agencies): Society for Propagation of Ayurveda, Naturophathy & Yoga (SPANY)-i Mizoram nung Arogo lenirtem dang Yoga indang junga bushisüngdangtsüla, ta shiogo.
Arogo lenirtemi Yoga ji Hindu nunger tesayuba den tesentaktep lir, anungji Yoga benshiba tetezüji Khristan tangatetba melenshidaktsütsü aser tesülen Hindu akümtsü atema lir ta jembiba mapang ka nung SPANY-i iba temepishiba agütsüogo.
Arogo lenirtemi Yoga indang mashileni angatet südi ta shia SPANY-i, “Arogo lenirtemi onok Centre nung arua iba indang junga bushidaktsüner,” ta ashi.
SPANY lenir aser International Yoga therapist, Bijoy Laxmi Hota-i, Yoga ya temang aser shisatsü anema alitsü atema benshia arur, aser iba ya tamangba yimsü den sentaktepa mali, ta ashi. Laisa, Yoga ya Hindu aser Khristan tamangba yimsü metenzükdang yongi benshia liasü, ta ashi.
Mizoram Police nema Yoga training agütsütsü, ta laisa shisem.
Union sorkar tetuyuba kübok tentetba, SPANY-i Laxmi lenisüba kübok Ayush Conference Hall, Bungkawn, Aizawl nung physical & stress management training agütsüdar. Instructor post atema Mizoram police 16 shi shimer physical & stress management training agütsüdar.
Tamalen Mizoram nung tongti Arogotem nung lenirtemi akümba luden, Mizoram Kohran Hruaitute Committee (MKHC)-i sangdong ka ajanga Yoga mebenshitsüla, kechiyong iba ya Hindu tangatetba nung ajemdaka lir aser Khristan tem atema majung, ta sangdonga liasü.
Kasa sangdong nungsa, “Yoga ajanga shirang karbo aneptsütsüa akok, ajisüaka Yisu Khrista-i rangben aneptsüba ama taneptsü magütsütettsü,” ta shia liasü.