Arogotsürtemi lokti kiyimba indang o toktep

Dimapur, Sept.24 (TYO) :  Dimapur Ao Baptist Arogo (DABA) nung Arogotsürtemi tan hopta tetsür Merali Fellowship sentep nung ” Lokti Kiyim nung adenbaji ajak asoshi tajungba,” ta asüba onük nung o toktepba sentong tajung ka agia liasü.
Iba sentong nung o onük pu sema jembirtemi lokti kiyimba ajanga mapang aser rongsen kümzükba tajangzük indang shia liasü aser onük anema jembirtemi lokti masü saka kija kiyimba sentong agiba ajanga bentetbenteta tanüla nung temoatsü ngua agitetba indang jembia liasü.
Iba o toktepba nung shilem agirtem ajaki kanga junga jembi aser tera agi Lokti kiyim pusema jembirtemi akok.
DABA nung taoba küm ishika jakdang nungi anogo telatet kar nung lokti kiyim sentong agia arur.
Ano, taküm 2016 küm nungibo DABA nung temeshi kiyimertem asoshi anogo aser inyakyim telatet  kar agüja lir aser item rongnung kaji kibong akümer shinga nema tarur nem sempet (return gifts) agütsütsü memelar aser kiyimba sentep sentong agitsübajia Bodbar anogobo anepdang tsütsü dang melatsü aser Brehostibar anogobo nikongtsütsü dang melatsü aser  ano  Hombar aser Honibar anogo nungbo kiyimba sentong malitsü.
Ano, DABA nung kibong akümba sentong December 19 nungi January 2 tashi magitsü lemteta lir.