Arok Osep Asahdangba, Shilem Ana

~ T. Meren Paul, 91, Lower PR Hill, Kohima.

Shilem Ana, Zonizüng Nüngja Ratet
Asen tzürapuri Ita Anü dang “Zoni” ta aja aser ibaji lemsaa züngdangba agi Calendar dang “Zonizüng” ta jatetogo ta Arok Osep Shilem ana, page 302 tetenzüklenji zülua angur. Ita Anü dang Zoni ta ajabaji kuli tejangja ken karbo lir maliar ozü yimeribo mangashidang saka Arok Osep nung reprangdangra Ita aser Anü anapronglaji mejet mejeta tejangja palala yami shia angur. Page 26, tejima tachichi (right column) tarensen 4 buba (Sl) nung- Anü/ alima nem tatsük aser tesangwa agütsüba, sun ta zülua angur. Page 61, tejima tachichi tarensen 10- Ita, italanu, itama, page 62- itasen itaya yamaji terasa angur. Page 297, tejima tabilen, tarensen 4 nung Zoni/ anü, teperang, tesangwa tulu, sun, used in poetic term ta zülua angur. Iba ratet ajanga Zoni ta asübaji Anü “noun” ka ama jembiba masü saka naro ken (naklu) nung amshiba südi anungji abstract noun, proper noun melena amshitsüji tim masü. Jungle eri yim anüngsa/süngsama nung nülak asongdang ita anü tsüngrem tenüng amshir, azüngashidanga, külemküjadang ita anü tenüng amshir, putu menden atsüngdang ita anü tsüngremdang azüngashia tatah shilang agizüker saka Zoni ta tenüng amshibabo otsü mangazük aser mangashidang.
Asenoki Anü melenshiba mangutsü saka küm nungi küm tashi anepdang Anü adokbaji nekongdang küsa Anüji aluba angutsü. Anü ya marakzür (stationary body) saka alimai pa meküta alonger saka ita bo melenshir kechiaser itai alima meküta alonger. Ita yagi küm nungi küm tashi anogoshia melenshiba angur. Ibajagi English nung Full moon (Ita naridang, anogo asem lir Anümi), Half moon (Ita Manku lepma), Quarter moon (Ita tongma), Dark moon (Ima), New moon (Ita asong) ta ita melenshiba indang nüngja ajar. Yamaji küm ka nung ita melenba shia azüngba 12 ben melenshiba agiteter aser iba azüngba dangji Itazüng ta ang ajatsüashi; ita azüng nung Anü azüng (Zonizüng) ta koda ajatsüaji?
Alima kin ajaki alemli nungi Calendar amshia aru saka liru memedem aser pei lima saseb nungdang amshia aru. Calendar otzü reprangdangra itüm calendar tüm ya angur; 1. Hijri Calendar, 2. Mayan, 3. Aztecan, 4. Egyptian, 5. Mesopotamian, 6. Iranian, 7. Hindu, 8. Buddhist, 9. Pre Columbian Mesoamarica, 10. Hellenistic, 11. Julian, 12. Gregorian. Ibri nungeria par Calendar Ita 12 prongla tenüng jateta meliaka amshia aru saka parnok Babylon limai tepuokdaki bener aoba sülen par tetsü tebo Calendar masü saka Babylonian
Calendar amshitsü tenzük anungji Calendar tejen otzü nung par Calendar yia mali. Roman nunger Calendar 509 BC nungi amshia aru aser Romn Empire alima aika amokbanga yimsü asüba mapang General Julius Caesar Roman yimli nung yimsü asüba mapang Roman Calendar nung meshidak tulu lir ta ajiteta pai Alexandrian Astronomer Sasigenes anioker Roman Calendarji yanglushia Julian Calendar ta tenüng melen. Roman Calendar nung anogo minute ka aibelena züngoka aliba ajanga 46 BC küm anogo 355 nungi anogo 378 kümdaktsü aser anosa meshidak puteta alima yangluba anogo nungi alimai anü meketa alongba mapang ajak asadanger liru medemtsü asoshi ano anogo 67 pendenlok anungji BC 46 küm anogo 445 kümdaktsü aser alima nung küm ka nung anogo timtibaji BC 46 nungji liasu. Iba sülen Julian calendar nung küm nung anogo (365.242189 days) asadangteta amshia aru. Saka tesülen 1582 küm Pope Gregory XIII bushitetba agi Astromoner Sasigenes-i küm ka nung 11 minutes 14 seconds agi eshiba yangluba agi joko 1500 AD tashi nung anogo 10 tashi talila kumer liasü anungji Pope Gregory-i anir Calendarji yanglushia küm ka nung anogo 365.2425 (365ta asahtet aser leap year küm pezü nung ken February ita anogo 29 nung sümedema yanglu aser iba Calendar dangji Gregorian Calendar ta ajar aser alima ajak nung asenoki ibaji amshia arur. Ita tenüng komasür jatet süra ibaibo Julian Calendar nungi tenüng memelen; English nung yamai agüja lir, 1. January- Middle English- Januari, Old English- Januarius, translation of Latin Januarius, named after JANUS, god of beginning, 2. February-Old English- Februarius from Latin Februarius for Februa, the feast of purification, 3. March- Midddle English- March, from Latin Martius, (month of) Mars, 4. April- Middle English Averil, Old French Avril, Latin Aprilis mensis (month). The name may derive from the Greek goddess of Love, Aphrodite, 5. May- Old English Malus, Latin Maius mensis (month) from the Greek Maia, Goddess of Spring, 6. June- Middle English June Old English Junius, from Latin mensis Junius, named after the goddess June, Queen of the gods, 7. July- Middle English Julie, Old English Julius, from Latin Julius (Caesar) after whom it was named in 44 BC. The Original name was Quintilis, fifth month in the early Roman calendar, 8. August- Old English Agustus from Latin Augustus (Caesar) 8 BC. The original name was sextilis, sixth month in the early Roman calendar. 9. September- Middle English September from Latin September, seventh month in the early Roman calendar, 10. October- Old English from Latin October, eight month in the early Roman calendar, 11. November- Old English from Latin November, ninth month in the early Roman calendar, 12. December- Middle Engllish Decembre from Old French and Latin December, tenth month of the early Roman calendar (decem means Ten and membri means month)
Iba yagi angateter, ita tenüngji küm merijang asem shi nungi jateta amshir aser tsüngremtüm aser chuba tenüng nungi agiteta amshir. Calendar ka yanglutsüji alimai anü meketa anütsüng (orbit) nung mapang kowi agia jajar itümji Astronomertümi onko tesashi inyaker adoka yanglur agütsüba nung tenüng tapet amshia küm merijang asemdak jia amshia aru saka tanü asen Aor asen tettsü tebo nüngja tajung jateta aliba ajak dokdoka indoker tenüng tasen purateta amshidagi. Jungliyimti, Soyim, Koridang tashi nung ano ita ajak tenüng mejatet liasü südi kechiyong Ao Naga- J. P. Mills (page 401) nung it tenüng maka aka, ana, asem, pezu … Moatsü ita, Chamecha yi (Moatsü sülen), Achitaka (alu amen mamen achia ataba), Chesemyi (alu arotsü chi agizükba), Thangmuchisang (alu rozükli), Terkha ita ta zülua angutsü. Mongseneribo itüm ita pezü- Chalibang lata, Urangba Lata, Moatsü lata, Am late ta tenüng pezü dak alaka tanga ita tenüng jateta mali asü ta Mills ibo ashir. Arok Osep page 194, Sl. 8 nung sangremsüyok/ asükwa suir ajungbena tanaben asükwa shiluba, sangremeri sü yokdoker ataba mapang ta rateta lir saka koba ita nung ibai ataloker iba ita tenüngjibo meyimpanga ayur kechiyong sangremsüyokji February ita nung shiluer saka February ita ajungben tanaben asük shiluba dangji Tsüklayi ta tenüng jateta lir.

Hapta ka nung anogo Tenet Rated.
Arok Osep anogo nüngja indang mejembidang tamasa week days (hapta) nung anogo tenüng komasür jatetar reprangdangdi. Laishiba nung Lipok kaket nung Yehova Tsüngremi anogo pungu agia alima aser yangji aliba ajak yanglu, teroknüpuba nung nisung yanglu aser tenet pubaji pai yangluba ajak meshiteta among ta angur. Anungji hapta kaji anogo tenet ta züngshia arur. Ibri nungeri anogo azüngdang ankongpang nungi masü saka nekongdang nungi asüng nekongdang tashi azünger. Ibri nunger hapta nung anogo tenet yamai tenüng agütsür. (1) Yom Rishon tetetzü 1st day- Sunday, (2) Yom Sheni tetetzü 2nd day- Monday, (3) Yom Shlishi tetetzü 3rd day- Tuesday, (4) Yom Revi tetetzü 4th day-
Wednesday, (5) Yom Chamishi tetetzü- 5th day- Thursday, (6) Yom Shishi tetetzü- 6th day- Friday, (7) Yom Shabbat tetetzü- Saturday. Ibri nungri Tsüngremi alima yangluba mezüng anogoji Sunday (Yom Rishon) ta züngshir anungji Saturday ji Shabbat aser anogo tenetnü puba Yehova Tsüngremi meshiteta amungba anogo.
Roman nunger amongba aser Julian Calendar nung anogo tenüng agütsüba koba Gregorian Calendar nung angur aser tanü alima ajak nung amshir, iba tenüngji yamai tenzük. Aki Astronomer tümi Sun, Mon, Mars, Mercury, Jupiter, Venus aser Saturn itüm ya planet 7 ta züngshi anungji hapta anogo tenüngji itüm anüng nung aliba tenüng kaka agütsü. Mezüng anogoji mezüng tesangwa agütsüsang Anü- Sun amshia Sunday ta aja. Tanabupa anogo tenüngji ita- Luna Mon amshia Monday ta aja. Tasembupa anogo Mars, Pezü bupa anogo Mercurius nungi Mercury ta aja. Pungo bupa anogo Luppiter Jupiter nüngtem Jupiter ta aja. Terokbupa anogo Venuses nungi Venus ta aja aser tenet puba anogo Saturn tenüng amshia Saturn ta aja. French nungri Sunday, Monday, Mardi, Mercredi, Jeudi, Vendredi, Saturday ta amshi. Anglo Saxon Yimsüsüba mapang parnoki planet 4 tenüng endok aser par Norse tsüngrem tenüng Tiw, Woden, Thor aser Frigg amshia hapta nung teyong nung aliba anogo Tuesday, Wednesday, Thursday, Friday ta milen aser tanü tashi alima ajak nung ibaji amshir. Asameese agi Hombar, Mongolbar, Budhbar, Prehosbetibar, Hokulbar, Honibar, Deobar ta amshir.
Tsüngremi alima yangluba maparen, Lipok kaket 1 tekong 4 nungji reprangdangra mezüngnü pai alima yanglu aser Tesangwa adokdaktsü aser tesangwaji ammang nungi sadang. 5. Tsüngremi tesangwa dang “Anogo” aser ammang dang “Aonung” ta aja. Aonung aseer anepdang naji anogo mezüngbuba ta aja. Yamaji pai mapa palala anogo tananü, tasemnü, pezünü, pungonü tashi alimaji yanglua renem aser teroknü buba nung nisung yanglu. Ljpok 1: 26-31. Anogo tenetnü bubaji Pai yangluba ajak meshiteta among, Lipok 2:3. Aji oda Tsungremi alima yangluba anogo 1 nungi 7 tashi agi hapta ka ajunger. Arok Osep ano madokdang Calendar tenüng Zonizüng ta jateter yaküm nungi ita terana nungja ajak tasen purateta adokogo. Calendar indang yaküm osang kakettüm nung peria züluogo anungji yangi melepshili. Calendar indang osang kaket nung züluba atema ni Ao Senden Presidential Councili jaoka ken o asishitepogo aser panüji Mendendi ajanga Zonizüng meshidak adokba rajemogo anungji taruba küm yanglushir adoktsü onoki lemtetogo aser nai züluba nungtuagia ana asem ka bo ageteta lir ta ashi, saka parnoki Zonizüng meshidak adok tabo agizük saka kü denbo ken o ashishitep. Calendar indang yaküm zülua doker asünung tanbo Hapta anogo indang dang yangi rasahdi.
Aki otsüla obola nunger mapang anogo ka agiteta amungnü ta sür amungba anogo kecha ken aser otsü mali asütsü. Amungnü ya nüngja taila, khrista yimsü arur külenang arogo nungeri amungba, saka limapur bo mamung. Amungnü ta süra limapur amungba anogo asütsü saka laishiba nung Yehova Tsüngremi anogo terok tashi yangluba meshiteta amungba anogo nungi tenüngji agiteta amshidi süra Meshitetnü, Temeshimungnü ta ajatsüla. Tentonü, Sangtennü, Rasemnü, itüm anogo telatet makaba puratetba tenüng. Asen tzürapur anogozüng maka asü, anü adokba aser anü aibaji anogo ka ta züngshi aser zülu maka asünung anogo adakzüktepdang yongsük neta zünga bener senshitep. Asenok züngya nung terpungo tashi zünger ter terok ta masü metsü maben terok, metsü maben tenet ta züngyonga metsü tasahi atu aser metsür ka nungi metsur pungo tashi zünger semer maben terok ta züngyaji amshi aser 16 nungi 19 tashi Roman nung züluba den tera putepa angur. Tzürapurbo sentong/lentong anogo aki masü saka mongpu aki bener arutsüba nung anidaka ao. Alu ka inyaktsü asoshi mapang adakzüka maka saka alu makok tashi inyak aser alu koba jenjang tashi inyakteta aka iba yari wadang anünga aliba minyakma tashi nübu nüngdaka liasü. Anungji Tentonü, Sangtennü, Rasemnü ta kecha maka asü. Yangtepnü aser Küptoknü ta telatet maka asü. Aluyimerji züngar tenteta liasü aser künüamati züngarji küm tepiyong yangtepa ka lui künü aser ka lui künü ta yangtepa alu inyak. Hapta nung kenüdang yangtep ta asübaji tamangmangtsü aser tamagitsü o. Yamaji Küptoknü ta nür lui nisung 6 künü yangtepi aru nung nai anogo ka dang kodasür küptoktsü? Na anogo terok küpdoktsü anungji anogo terok pronglaji na asoshi küpdoknü alitsü. Ano Rogonü ta anogo ka jateta akabaji kanga meshidak. Rogoi aobaji kidong kimang nung manemshiluer kibong kar adokdang mapang apir kidong, kimangi lemteter aor aser menüngdakra maoer saka anogo ka lemteta maka. Osep nung page 289/1 nung yamgtepnü tetetzü yamai rateta lir, “ yangtep/ anogo melentepa ka mapa kenü aser ka mapa kenü ta inyakba” ta shia lir. Osep nungbo anogo shia yangteper ta rateta aguja lir saka hapta anogozüng nung bo hapta nung kenü dang yangteper ta ashir, ibaji tesüngmangtsü mapa, ya koda bentettsü?
Asen Aor haptabo lateta maka asü saka anogo indang jembishinüdang Tanü, Asüng, Yanü, Yimnü, Mokonü, Mükünnü, Songtoknü ta anogo 7 tashi nüngmaka amshia aru. Yamaji aonung ah Taonung, Asüng ongnung,Yanü ongnung, Yimnü ongnung, Mokonü ongnung, Mükünnü ongnung, Songtoknü ongnung ta jembir. Anütettsü maka asüyonga anüngdang aser aonung mapang telemsa yamai amshi. Ankongbang, Mezüng ankong, tanaben ankong, tasemben ankong, sangwabang, züngia, Anütsüng ayang, Anepbong, Toroto, Anjungmeshi, anjungmanga, Akpur meshi, Anü tai, Nikongtsütsü, Nikongdang, Tzükisen, Kishirep, Yiprep, Ayaterm/Poklem. Yamaji anogo tenüngjateta meliaka asen tzürapuri mapang telemsa penteta amshia aru. Mapa agi mesayutetba aser matalokba tenüng purateta amshibaji tesayuba tai asütsü anungji class A,B nung angazükba Sunday, Monday jiang amshiyong kechi tamajung mesura asen kiyonger Assameese nungeri amshiba Hombar, Mongolbar ta asübaji asen oshi den saku kumer masü na?

Sentsü balala
Page 304, Tarensen 3 nung Tenenya – Yellow ta alibaji Tenenya masü saka Wakong ta asütsü. Page 282 RC, Sl. 12 nung wakong/ sentsü tapu ka Tenenya, Yellow ta shia lir. Tenenya aser Wakong anaji balala aser yellow ji sentsü ka dang nung kodaser Wakong aser Tenenya ta sentsü ana adoktsü. Green ya Tenenya ta ajar saka Tamak ta agüja lir. Tamakji koba sentsü südir tuli agi kanga tua aremba dang ajar. Temeypktep sentsü, Tsükrapusa, Temdangpusa itüm ya sentsü nung marutsü.
Kaket asahdangba nung maneni Ojang ka shilua anabenbupa züludang spelling balala züluba, tetetzü tai ratetba aser alphabetical order (Tarensen) tai nung aliba ni noklang eshika bendena alibaya kenü kar, kenü kar ta osang kaket nung agutsütsü merangtsü aser tazüngeri pei kaket nung itümji metongshia shidakbaji züluoka ayu nung ajungtsü. Shidakba agi kaket züluri iba kaket nung page paika nungji tai itümii lir anu gji yamai metongshia züngang ta corrigendum agütsür saka tezüluri ibaji minyaker, kechi adokogo aji tadok ta sür yutsüba jakla sayur. Anungji aseni asen sasa metongshia yudi ta ayongzüker.