Arrla 370 agienra J&K-i India den tesendaktep reprangshitsü: Mehbooba

Srinagar (Jammu & Kashmir), March 30 (Agencies): India temzüng kübok Arrla 370 agi Jammu & Kashmir aser India na tsüngda apu latsür, ajisüaka iba Arrla agienra state nüburtemi tanaben shisadanga India küboksa alitsü asü malitsü, ibaji lemtettsü, ta tanü taoba mapang Chief Minister Mehbooba Mufti-i metetdaktsüogo.
Lar party Peoples Democratic Party nung inyakertem den jembidang lai, Arrla 370 agienadokra Jammu & Kashmir aser India na tsüngda onük tasen kar latettsü, ta ashi.
“Iba ama tensa ka nungji Muslim nunger nütsüng timba aliba state- Jammu & Kashmir nüburtemi India nunger densa alitsü asü malitsüar lemtettsü,” ta lai ashi.
“Nenoki iba apuji (Arrla 370) raksara, nenoki India aser Jammu & Kashmir na tesendaktep yanglushitsü atema ketdangsüa inyaktsüsa akümtsü,” ta Peoples Democratic Party (PDP) tongti lenir, Mehbooba-i ashi.
“Nenoki (India) Arrla 370 agienra Jammu & Kashmir den tesendaktep tembangtsü,” ta lai metetdaktsü.
Tawa Union Finance Minister, Arun Jaitley-i, Arrla 35A ya temzüng raksatsüsa lir aser Jammu & Kashmir rongsenkettsüng terenlok nung tetsükdaktsü ka lir, ta jembiba dak sendakba nung Mehbooba-i item o ya jembir.