Arrla 370 aser arrla 35A kümzüka ayutsü: J&K sorkar

Srinagar, October 06 (Agencies): Tanü Jammu & Kashmir sorkari, India Temzüng kübok state nem maongka balaka agüja alibaji kümzüka ayutsü, ta shiogo.

Tanü Srinagar nung J&K assembly nung Law minister, Basharat Bukhari-i, “Arrla 370 aser Arrla 35-A kümzüka ayutsü aser wazüka ayutsü atema onok yangi lir,” ta ashi.

Opposition National Conference aser Congress-i Question Hour thinener Article 35-A onük nung o lemteptsü akhangba mapang minister-i ibaji sangdonga liasü.

“Question Hour ya House nung nüburtem onük süoka jembitsü atema lir. Anungji yimlibilema rongrong madokdaktsüner,” ta Minister-i opposition dang ashi.

Teloktep sorkar tenüng nung Bukhari-i, “Oang aser ozüngtemji züngang. Nenok (Opposition züngsemtem) kechi atema asateper (?) Yamai asaperangba ajanga nenoki senden senti mapang intoker,” ta pai ashi.

Senden nung maneni rongrong adokba ajanga Bukhari-i, nüburtem onük jembitsü atema Opposition-i süoki ia magir, ta aitsü.

“Parnoki senden nung rongrong dang adokdaktsüner. Question Hour thinentsüji nüngdak madoker. Arrla 35A ya judicial-i reprangshimdar aser züngsemtemi benshitsü atema temzüngtem lateta lir,” ta pai ashi.

Tanep iba senden nung Mohammad Akbar Lone, Devendra Singh Rana, Ali Mohammad Sagar, Mohammad Usman Majeed, G M Saroori aser Sheikh Abdul Rashid nunger densema Opposition züngsemtem sabangleni oa Speaker dak asalokja liasü.

Iba mapang nungji Speaker Kavinder Gupta-i, “yimlibilema menang. Nenok onük benoktsü atema House-i mapang agütsütsü,” ta ashi.

Tesülen osangbenertem den jembidang Bukhari-i, “Parnoki (NC) senden ajunga nung rongrong magütsütsüla ser nung agütsüogo ta ni bilemer. Parnoki arutsüla. Nübur onüktem lir. Parnoki item onük benokba mapang onoki telangzüba agütsütsü,” ta ashi.

Opposition-i sorkar anema noktakba nung kecha tamajung mali, ajisüaka parnoki Speaker-i ashiba angatsüla, ta paisa ashi.

“Sorkar anema noktakba nung kecha tamajung mali. Onok opposition nung aliba mapang onoki-a yamaji inyakogo, ajisüaka parnoki Speaker-i ashibaji angatsüla,” ta pai ashi.