Arrla 371 A memelenshii dang lir: NPCC

Dimapur, July 6 (TYO): Governor R N Ravi-i Nagaland nung temzüng-ozüng tensa mejungi aliba ajanga Linük Temzüng nung 371 A (1) (b) benoktsü akok ta kümdangtsü ashiba atema state sorkari osang tiyazü agütsüba atema aoksar, ta Nagaland Pradesh Congress Committee (NPCC)-i tanü metetdaktsüogo.
“Arrla 371 A (1) nung clause balala 4 lir aser item nung ajemdaker 1963 küm Nagaland state tentet aser tanü tashi item ozüng amshir. Arrla 371 A (1) (a) ajanga Naga nunger nem State Assembly-i bangzüng renemba sülen Parliament-i yangluba Act mamshitsü indang temeten balaka agüja aliba dak alaka, Arrla 371 A (1) (b) ajanga Nagaland Governor nem temzüng-ozüng tsütsü teinyaktsü balaka lemzükja lir,” ta NPCC-i sangdong ka nung ashi.
“Governor-i Linük Temzüng nung agüja aliba teinyaktsü balakaji inyaktsü nüngdak madoker ta India Tiri angatetba sülen ang pai Governor dang iba mapa meinyaktsü atema tetuyuba agütsütsü akok,” ta Working President, NPCC Khriedi Theünuo-i sangdong nung shia lir.
“December 17, 2013 nü state Assembly nung Governor nem teinyaktsü balala lemzükja aliba agientsü asoshi bangzüng ka renemba jagi meperir kechiyong Parliament-i Arrla 371 A (1) (b) memelenshi lir,” ta paisa ashi.
State sorkari Governor ket nungi temzüng-ozüng tashi agiennüra, sorkari inyakyim shitak lateta aliba ama inyaktsüla mesüra Nagaland nung temzüng tsütsü tebilemtsü ajurutsü akok, ta NPCC-isa sorkar dang metetdaktsüogo.