Arrla 371(A) aser ILP ajanga Nagaland nung Citizenship Bill mamshitettsü: P.B Acharya

Kohima, January 26 (TYO): Kaketshir teloktemi Citizenship (Amendment) Bill 2016 anema aser Yung Aung-i aniba NSCN(K)-i India anema mokdangtsü ayongaka Honibarnü Nagaland nung 70 buba Republic Day mungogo.
Tanü lendong-tsüdong kecha mataloki dang süiogo saka benjung nung kaketshirtem aser public madenba ajanga kanga azüngazünga liasü.
Secretariat Plaza nung benjung tongtiba amungba nunga Administrative Heads of Departments aser Heads of Departments atema menden lemzüka yutsüba nung tamener aika maliasü.
Chief Minister Neiphiu Rio aser Speaker in-charge Zhaleo Rio lia linük wako saladang Nagaland Governor P B Acharya-i “Naga nunger sobaliba aser inyakyimtem kümzüka ayutsü atema Indian Constitution nung Arrla 371(A) kübok temeten balaka agütsü” ta ashi.
Item temeten balaka lateta aliba ajanga Nagaland nung alirtem kümzüka ayuba dang masü saka nübortem tejakleni aotsü aser renloktsü atema maongka agütsür, ta paisa ashi.
Tawa Lok Sabha nung agizükba Citizenship Amendment Bill atema state sorkari tebilemtsü abener saka iba Bill ya Nagaland nungbo benshitsü makok ta onoki bilemer, kechiyong asenok Arrla 371 (A) aser Inner Line Permit ajanga kümzüka lir, ta Acharya-isa nenshia metetdaktsü.
Ajisüaka, North East State tem nung aliba lisopurtem indang temeten ajunga kümzüka ayutsü atema Centre-i asüngdangyatsüla ta paisa ashi.
“Citizenship Amendment Bill, 2016 jungjunga rajemtsü atema onoki Nagaland Legislative Assembly nung Standing Committee on Article 371 (A) dangi iba bill benogo” ta Governor-isa shisem.
State sorkari Naga yimten latettsü atema temulung agüja mapa inyaker aser onoki Centre aser Naga yimtenren teloktem tsüngda teyariteper ka ama shilem agitsü nangzüka lir. Kin hohotem, tongti teloktemi, Arogo, Civil society, NGOs aser NNPGs-i mapa inyakba ajanga tanü Naga yimten latettsü atema mapang tajung ka ajurua lir ama bilemer aser küm 70 dak tema jembia aruba onük angatetteptsü imlar, ta paisa ashi.
State sorkarisa sorkar junga ketdangsütsü aser terenlok bener arutsü atema tenangzükba agia mapa balala inyaker. Sorkar Department tem indang websites update asüba ajanga sorkar ketdangsübaren tezübaba kümdaktsüogo aser CM Dashboard ajanga nübortem dang mapa inyakba osang tejangja lemsateper, ta Acharya-isa ashi.
Sorkari kaketshirtem atema kanga bilemtsür aser iba asoshi Centrally Sponsored Scholarship Schemes aika tenzüktsüogo aser State Merit & Research Scholarship agüja Students aser Research Scholars ajungketer. SSA & RMSA tesayurtem atema scale pay agizükogo saka India sorkari fixed amounts nung dang senotsü agütsür, ta paisa shisem.
Governor-isa ashiba agi, PDA sorkari saisapong ajungkettsü nükjidong nung Nagaland asoshi mezüngbuba Ranji Trophy Match Dimapur nung asaya. Onokisa Dr. T. Ao Centenary Year amunger aser Dimapur nung Dr. T. Ao Football Academy atema mapa inyaker.
Pughoboto aser Mon nung outdoor stadiums yanglutsü tenzükogo aser I.G Stadium, Kohima nung Astro Turf enokba mapa tembangogo, ta paisa shisem.
Acharya-i skill development atema jembidang Nagaland Tool Room and Training Centre Dimapur nung Vocational Training atema wadang tasen kar enoksemogo aser Nagaland Skills Development and Entrepreneurship Society tentetogo, ta ashi.
Swachh Bharat kübok Nagaland-i mapa tajung inyaka arur aser Rural Nagaland dang Open Defecation Free ta sangoktsüogo. Sorkari aluyimertem ajungkettsü atema meranger aser Horticulture & allied Agriculture activities tajungba inyakba ajanga aluyimertem ajangzüker. January 19 nü International Fund for Agriculture Development den yaritepa Nagaland nung FOCUS – Fostering upland Agriculture System Project tenzükogo, ta Governor-isa ashi.
Eastern Nagaland tesem nung rongsenkettsüng jenjang ajungkettsü bilema DUDA Department-i Mon, Tuensang, Longleng, Kiphire District HQs nung Anghya Market Linkage Hubs asr “ANGHYA” brand & labels tenzükogo, ta paisa metetdaktsü.
Lanurtem asoshi Science and Technology and Information Technology tongtipang ta ajiteta yaküm Dimapur nung Innovation Hub and Space Education Centre and Planetarium lapok aser taküm March ita Kohima nung Innovation Hub and Digital Planetarium ka lapoktsü sentong lir.
Special Road Programmes, NABARD-RIDF, PMGSY aser GOI ajanga lenmang yanglutsü tetuyuba kübok lenmang 6 National Highway kübok dendaktsütsü mulunga agizükogo, ta Acharya-isa ashi.
Power sector tsütsü Dimapur nung 100 MVA nungi 200 MVA ajungketogo aser Dimapur-Zhadima tashi 220KV D/C Transmission line mapa kanga junga inyakdar, ta paisa metetdaktsü.
Mokokchung: Imkongmeren Sports Complex, Mokokchung nung amunga sentong nung Transport, Civil Aviation & Railways & Land Resources Minister, P. Paiwang Konyak-i tetushi süa jaoker ama shilem agi.
Sentong nung Takowati, Rtd. Inspector, NAP-i dog show, Khensa Cultural Troupe-i yartsüngsang, Naga Wadir Club, Ungma-i sobaliba ken aser Gorkha Union, Mokokchung-i tsüngsang ajanga shilem agi.
Dimapur: DDSC Stadium Dimapur nung Urban Development, Municipal Affairs, Minister Metsubo Jamir-i linük wako salatsü.
Sentong nung Dimasa Kachari Cultural Club-i sobaliba shilem ka agi aser Metsubo-i exhibition stalls lapoktsü. Nikongtsütsü agiba sentong nung Dobashis, Dimapur District aser GB’s Union Dimapur tsüngda football asaya.