Arrla 371(A) aser Women Reservation onük ya Naga nungeri mangateti adok

Kohima, November 14 (TYO): Naga nungeri ozüng tsütsü jungjunga memeteti Linük Temzüng nung Arrla 371(A) aser Nagaland nung Women Reservation ya onük tulu ka kümdaktsü.
Tanü “Article 371A and Women reservation – the Naga debate” indang onük jembidang taoba Supreme Court Chief Justice, Justice H K Sema-i iba osang metetdaktsü.
Mongulbarnü SIRD Hall, Kohima nung Department of English, Nagaland University aser Naga Mothers’ Association külemi yaritepa Training of Trainers on Women’s Rights and Peace sentong nung pai iba onük jembi.
Arrla 371(A) ajanga Nagaland nung urban local bodies election nung tetsür nem shilem lemzüktsüba nung tetsükdaktsü ajuruba atema kanga sasar, ta paisa shisem.
Nagaland state nung Parliament indang act kecha mapa küma meinyaktsü ta Arrla 371(A) tetenzük nung shia lir. Ajisüaka, tetsür nem shilem lemzüktsüba yabo Parliament indang Act ka masü saka Nagaland Assembly-i yangluba ozüng ka lir. Arrla 371(A) tatemlen ‘Nagaland Legislative Assembly-i ozüng yanglura,’ ta shia lir aser ibaji Linük Temzüngi State Assembly nem ozüng yanglutsü tashi agütsüba lir, ta tanü Justice H K Sema-i ashi.
Iba sentong nung Social activist Niketou Iralu-i Women and Peace, Dr Visakhono Hibo-i Sexual harassment at workplace, Advocate Kezhosano Kikhi-i Women’s reproductive and health rights aser Clinical Psychologist Lovika-i Mental health onüktem jembi.