Arrla 371(A) dak sendakba nung ‘whip’ magütsütsüla : Dr Neiphrezo

Kohima, March 24 (TYO) : MLA, Dr. Neiphrezo Keditsu-i, Linük Temzüng nung Arrla 371(A) dak kongshiba onüktem atemabo party aser sorkari MLA tem dak ‘whip’ mamshitsüla, ta tanü metetdaktsü.
Assembly nung Governor’s address nung shilem agia jembidang, “Kodang Arrla 371(A) dangi arudir, iba temeten ya House nung züngsemtem atema dang masü saka bendanglen aliba Naga nunger dena, ajak atema lir. Anungji, party aser government-i iba dak sendakba onük asoshibo züngsemtem dak ola madoki tashi angatsü tetuyuba magütsütsüla” Dr Neiphrezo-i mepishia ashi.
Naga nungertem tia taka aser India Linük Temzüng yanglurtem dang pelatsüla, kechiyong iba Arrla ajanga asenok nem maongka tulu agütsür. Iba maongkaji MLA tem dak teimba kongshir, anungji asenoki iba Arrla kümzüka ayutsüla, ta paisa shisem.
Tanü Governor’s address asoshi motion of thanks olemtep alidang, lanur MLA tem- Merentoshi aser Dr. Neiphrezo naprongi lanurtem ajangzüktsü atema onüktem benoka lemsatep aser tenatisa sorkar dang lanurtemi adokba ola angatsü mepishia liasü.
Merentoshi-i sorkar department ajak nung lanurtem ajungmeotsü atema senotsü balaka lemzüka yutsütsü tebilemba ka lemsatep.
Tawa ULB elections atema tensa mejungi akümba atema paisa ashiba agi, iba ya civil society temi inyakba dang masü saka zünger mapa manguba lanurtem jashiokba ajanga atalokba liasü.
Sorkari lanurtem taginüba metettsüla aser lanurtem adokba angaa telemtetbatem agitsüla. Sorkar ajanga tentetba Political Affairs Mission-i tekaratiba nung Naga Yimten Tebilemtsü atema telemtetba ka ngutettsü atema meranga inyaktsü ta imlar, kechiyong ibaji ajanga lanurtem nem tajangzük agütsütsü, ta Merentoshi-isa ashi.
Külen, Dr Neiphrezo-ia public sector undertaking nung temulung agütsütsü aser ibaji ajanga state nung mapa adokba den senotsü züintsü, ta ashi.
MLA Neiba Kronu-ia sorkar dang State aser linük adener oa aliba investor aser funding agency tem ajungkettsü atema Nagaland Investment Board ka tentettsü tebilemba lemsatep.
Iba olemtep nung Home Guard & Civil Defence Parliamentary Secretary, E.E. Pangteang aser Advisor to CM for Geology & Mining, Naiba Konyak natia shilem agia liasü.
Arrtsü anatsülen aliba Naga nungertem tesentaktep nung tetsükdaktsü majurutsü atema Centre-i Myanmar sorkar dang Indo-Myanmar arrtsü atsüdangba mapa teti atema anentsü jembiang ta sorkari telemtetba agiba osang Health & Family Welfare, P. Longon-i metetdaktsü.