Arrtsü adena Kurd YPG sepaitem amakba maparen manentsü: Erdogan

Istanbul, February 17 (Agencies): Turkey linüki arrtsü adena bomb-tem tsükdakja Syria nung alir Kurd kin nisungtemi tentetba People’s Protection Units (YPG) telok amakba maparen anentsü sentong maliba olen ka Turkey Tir, Tayyip Erdogan-i tanü, Bodbar nü metetdaktsüogo.

Ano, United States linüki Kurd telok mesüra par Turkey linük pusema nungitsü lemtettsü olen ka Erdogan-i tanü sangoktsü.

Russia mitkartemi par tayimtsü amshia anüng nungi bomb-tem tsükdakja amakba maparen nungi tajangzük ngua, US-i nungitba Kurd sepaitemi Turkey arrtsülen densemba tesemtem tanaben agitsüshitsü tenzükba ajanga Turkey tang kanga jashidakja lir.

Turkey-i anogo ishika tejaklen nungi tenzüka, bomb-tem arrtsü adena kalokja par linüki kiralongrar telok ta züngokba Kurd telok anema raraba osang bushiteta lir.

“Tanübo ozü linüki ozü linük amaker nungi kümzüka ayutsü maparen inyaker saka tarutsü mapangbo ozü linükia tongpang raratsüsa tensa ajurutsü akok,” ta Erdogan-i sangoktsü.

Par linük anülulentip tsütsülen densemba tesemtem nung telungpur aser kiralongrar tesep metentetdaktsütsü alizüng ayuba olen ka paisa metetdaktsüogo.

“Turkey southeast tsütsülen tesep tenteta Turkey sorkar anema raraba Kurdistan Workers Party (PKK) telok aser Syria nung alir Kurd YPG telok na sentaktepa alibaren züdokba ajanga ozü Turkey linüki tarutsü anogotem nung lendong tulu ajurutsü,” ta paisa shisem.