Arrtsü atema state temi tangatettep nung inyaktsüla: Sonowal

Shillong, May 26 (Agencies): Tang tasen shimba Assam Chief Minister, Sarbananda Sonowal-i, mapang talangka nungi Meghalaya-Assam state arrtsü  latettsü atema tangatettep nung inyaktsü nüngdak, ta metetdaktsü.

Sonowal-i,  “Assam, Meghalaya aser tanga North east state tem tsüngda state arrtsü mangatettep aliba ya ajanga ajak timtemer aser iba ya latettsü atema tejakleni aotsü lenmangji arok tangatettep nung inyaktsüla,” ta ashi.

Brihostibarnü Shillong nung nung Assam House lapoktsüba sülen osangbenertem den jembidang Sonowal-i, “Kechisa inyaktsü nüngdak, item ajungaji tangatettep nung inyaktsü, kechiyong tangatettep nung aintsü atema north east state ajaki tesentaktep tashi aittsü nüngdak,” ta ashi.

Meghalaya-Assam arrtsü mangatettep onük ya mapang tejen onük ka lir, koba ajanga Meghalaya aser Assam sepaitem tsüngda aiben kahtepogo. 2010 May 14 nüa iba mangatetep onük ajanga nisung pezü asü.

Assam nung BJP sorkar tashi aruogo, anungji iba mangatettep onük ya yakta latettsü asü (?) ta asüngdangba langzüdang Sonowal-i, “Senden amenba nung ajak takoktsü lir. Iba ya kibong ka indang onük lir, aser tesem ka nung aliba state tem ama anendaka aliba onüktem latettsü atema onoki inyaktsü,” ta ashi.

Iba onük latettsü atema Meghalaya Chief minister den o lemteptsü, ta paisa shisem.

2018 küm Meghalaya Assembly election dak sentakba tasüngdangba ka langzüdang Assam Chief minister-i, North East nütsüng ajaki melungsoa Ato kilonser Narendra Modi lenisüba kübok BJP agizükdar, aser iba ya junger, ta ashi.

Tang mezüng BJP-i north east state ka nung sorkar tashi aruba sülen joko Meghalaya densema tanga state temia BJP agizüktsü ta takzütetogo.

Meghalaya nung Tura nungi tang tasen shimba MP, Conrad K Sangma-i Congress sorkar atsüngdoktsü atema BJP-i regional party tem den lokteptsü atema (BJP nem) teimla agütsüogo.