Arrtsü jara mechi US sorkar mangatettep nung lir

Washington, Luchii/Dec. 22 (Agencies): US ozüng yanglurtemi budget agizüktsü makokba sülen US sorkar indang inyakyim kar shibangtsüsa kümogo.
US Tir, Donald Trump-i mapang talangka nungi Mexico den arrtsü nung jara inoktsü nangzüka aruba mapa küma inyaktsü asoshi sen tajemba agi billion $5 inoktsüla ta ajungshir.
Ozüng yanglurtemi Rongonü nikongdang senden anena lir.
Iba maparen atema memulungtepba ajanga US federal agency ajak nung senotsü teyari agütsüba shilem pezüsü nung shilem ka ayatirm (05:00 GMT Küptoknü) nungi soita atatsü.
Tetetzü department of Homeland Security, Transportation, Agriculture, State, aser Justice tem shibang tenzüktsü aser federal national parks aser forests tem nunga kongshitsü.
US nung sorkar department kar shibangtsüsa akümba ya 2018 küm tasembuba lir aser iba ajanga federal mapa inyaker nisung meyirijang aika taa melie mapa inyaktsü mesüra khen asoshi leave nung yutsütsü.
Sorkar department tem mapa inyak anen tenzüker Trump-i Twitter nung video ka ajanga nüburtem den jembiba mapang, iba mapa ya Democrats mechi lir, ta shia liasü.
Saka Democrats lennirtemi iba tensa ya tiri ajungmeso, ta tai tongloktsü.
Federal agency tem Tsüklai/February 8 tashi ajungben nüngdak nung amshitsü asoshi bill ka Rasemnü agizük, saka iba bill nung Trump-i yanglunüba arrtsü jara atema senotsü teyari inoka mali.
Pa busemer aser Republican nungi lennirtemi aitsüba sülen Trump-i meyongnem agütsütsü asoshi iba jara atema senotsü inoktsüla, ta nokdak.
Tang aliba temzüng nung senotsü indokba bill ya House of Representative ajanga simple majority vote agi agizüktsüla. House nung Trump’er teloki amokbanga lir, saka Aenjeti/January nungi Democrats temi amokbangtsü lir.
Iba jara yanglutsü atema House ajanga sen billion $5.7 agizüka lir, saka iba bill ya tir matongdang Senate nung vote 60 agi agizüktsüla, kong Republican tem menden 51 dang lir.
Trump-i kechiba jara ya yangluner?
US south tsütsü arrtsü jara yanglushitsü ya Trump election nübuyimba mapang nangzüka liasü.
Mexico arrtsü nung immigrant tem arrtsü jara alema arutsü nungtepba indang pai ashi aser linüki ozüng alema miim mozü aser mapa tamajung inyakertem aiter, ta ashi.
“Asenoki United States nung parnok maginür. Asen linük nung asenoki parnok ya maginür,” ta Trump-i ashi.
“Itemji anendaktsütsü asoshi jara den border security mesüra slat fence nüngdaker,” ta paisa ashi.
Tir asoshi nübuyimba mapang Mexico-i iba jara yangluba menokdaktsütsü, ta pai shia liasü saka iba linüki memulung.
Pa sentong asoshi US nung saru menokertemi magütsütsüla, ta Democrats tem akhang akhanga nokdaka lir.
Hopta tetenzüklen Trump busemertemi Mexico den arrtsü nung jara yanglutsü asoshi sen bendentsü page ka lapok aser anogo pezü nung sen million $13 dak tali bendena lir.
Senden tembangtsü anasa Rogonü aonung olemtep magitetba sülen Congress züngsemtem Capitol Hill nungi ogo, saka Küptoknü meyipa shilangtsü imlar.
Trump-i Twitter nung video ka post asüba nung, sorkar inyakyim shibangba atema par Republican teloki inyaktsü kecha mali aser iba tebilemtsü angatetteptsü asoshi Democrat temi par vote agütsütsüla, ta shia lir.
Iba mapa inyaktsü memulunger, ta Republican senator karibo Rogonü shiogo.
Sorkar inyakyim kar shibangba ajanga sorkar mapa inyaker nisung 380,000 shi khen atema taa melie leave agitsüsa akümtsü.
Saka tongtibang mapa inyaker 420,000 shi taa melie maneni mapa inyaktsü.