Arrtsü ken o bentettsü atema yimtenren telok ka tentettsü: Nepal

Kathmandu, February 12 (Agencies): Nepal linük sasep nung adokba arrtsü ken o bentettsü nükjidong nung Nepal nung tentetba tongti yimtenren telok 3 aser United Democratic Madhesi Front (UDMF) telok nati yimtenren telok ka tentettsü tezüngzütep tanü, Hokolbar nü agiogo.
Nepal Ato Kilonser, KP Sharma Oli-i par kidang senden ka jatepba sülen par provincial arrtsü den sentakba ken o ji bentettsü tezüngzüktep agi.
Iba ken o adokba sülen Nepal anülulentip tsütsülen densemba tesemtem nung mangatettep tulu adoka raratepba ajanga yaküm, 2015 küm nisung 50 dak tema asüba osang bushitetogo.
“Yimtenren telok 4 prongla nungi lenirtem shimoka tan tentet tasen ka tenteta Nepal-i ajurushia aliba arrtsü ken o ji bentettsü nangzüktepogo,” ta Oli-i tanü sangoktsü.
Oli-i tan February ita 19 nü nungi tenzüka India semdangba jakdang iba ken o ji bentettsü alizüng yua lir.
Nepal-i yaküm, 2015 küm September ita 20 nü agizükba linük temzüng tasenba nung Madhes kin aliba province 7 tashi nung federal model amshitsü ocetji magizükteti UDMF teloki aniba nüburtemi lenmang mokdangba den külemi, sorkar office-tem shibangja taoba ita 5 tashi longkak aitba osang jangjaogo.
Yamaji longkak aita arur külen UDMF-i aniba longkak aitertemi par longkak aittsüren anentsü telemtetba ka tan hopta agiogo.