Arrtsü nung mangatettep aliba bentettsü asoshi asadangtsü

Itanagar, Metsüremi 28 (Agencies): Mizoram aser Assam na tsüngda arrtsü nung mangatettep aliba bentettsü asoshi tamasa arrtsü nung ozüng alema kiojen yanglua aliba ajak bensatsü, ta Union home ministry (Northeast) joint secretary Satyendra Garg-i ashi. Pai iba tesem ya Sangtennü semdanga liasü.
Assam aser Mizoram nungi ketdangsertem aser lokti tentet balala den senden tambangba sülen osang benertem den sensaksemba mapang nung Garg-i ashiba agi, Assam Cachar districts kübok Hailakandi forest department ketdangser tejentem aser Mizoram kübok Kolasib district forest department ketdangser tem lenisüba kübok arrtsü nung reserve forest square mile 509 kübok ozüng alema kiojen yanglua aliba tem jangjashitsü asoshi joint committee ka tentettsü.
Paisa ashiba agi, join committee den külemi district anaprongla nungi police ketdangsertemi ita tsüngda ozüng alema kiojen yanglua aliba tem asadangtsü aser Rongchii (April) 30 nü tashi nungbo Union home ministry nem parnoki ngutetba tem osang agütsütsü. Iba sülen item kiojen tem bentsüyonga aotsü, ta Garg-isa ashi.
Maneni Grag-i, Sangtennü state ana nungi home department ketdangsertem aser Mizoram nungi Mizo Zirlai Pawl (MZP) densema lokti tentet balala den senden amenba mapang nung joint inspection committee ka tentettsüba atema telemtetba ya agi, ta ashi.
Paisa ashiba agi, arrtsü nung state anaprongla nung sepaitem Sangtennü nungi atsüngina aotsü.
Arrtsü nung lendong adokba mapang nung yirur kaketshirtem aser osangbenertem nem teyari agütsüba dak sendakba nung Garg-i ashiba agi, iba ken o ya Union home ministry nem agütsüogo aser takaratiba nung jenjang tapet agitsü.
Iba senden nung Assam principal secretary L.S. Changsan, Mizoram principal secretary Lalrinliana Fanai aser tanga ketdangsertem rongnung Assam DGP R.M. Singh aser Hailakandi o Kolasib superintendents of police dena liasü. Iba senden nung tang arrtsü nung mangatettep aliba tashiyim agi masü saka o agi angatettepa jembishinütsü lemtet.