Arrtsülen India-i tama injang makahtsü: Rajnath

Pakistan mitkar rongnung Director General Maj. Gen. Umar Farooq Burki-i tongtibang nisung kar anir Union Home Minister, Wb. Rajnath Singh den New Delhi nung ajurutepba noksa nung angur. Kasa noksa nung Director General, BSF, Wb. D.K. Pathak-a angur.

New Delhi, September 11 (Agencies): Hokolbar nü Pakistan mitkartemi Union home minister Rajnath Singh den ajurutepba mapang pai, international arrtsülen kodanga India-i tama injang makahtsü, ta ashi.

“India-i kidanger linük tem den yimjung nung liner. Pakistan arrtsülen India-i tama injang makahtsü,” ta Rajnath Singh-i Pakistan Director General (DG ) Maj Gen Umar Farooq Burki-i anir aruba mitkartem dang ashi.

Iba o langzüa Burki-i, “Ni home minister masü saka DG ka dang lir anungji nibo iba nungji tenangzükba takhang ka magütsütettsü,” ta ashi.

Aji oda süaka, Singh-i ashibaji Pakistan nung linük lenirtem dang pai oa ashitsü, ta Burki-i ashi.

Paisa, kiralongraba mapa anentsü asoshi India aser Pakistan na lungjemer inyaktsüla, ta shisem.

“Pakistan-a India linük amai kiralongrartemi nükpeta lir,” ta Singh-i parnok tarurtem dang ashi.

Singh-i, India-i Pakistan nung level balala ajak den olemtep kar kanür aser ibaji atema Ato Kilonser Narendra Modi-i Pakistan Ato kilonser Nawaz Sharif den Ufa, Russia nung ajurutepa liasü, ta ashi.

“Ajisüaka tia makai iba olemtep NSA level denbo makatet. Saka onoki Pakistan den tesentaktep tajung yuner. Ni iba ya küli keptok ka ama ashir masü saka küm mulung taroktiba (tah-e-dil-se) nungi ashir,” ta Singh-isa ashi.

Taoba mapang India Ato Kilonser Atal Bihari Vajpayee-i ashiba bilemteta, Singh-i, “Asenoki medemerbo melenteter saka kiyonger memelenteter, anungji kiyonger linük tem den tesendaktep tajung alitsüla,” ta ashi.