Arrtsülen nungi kiralongraba onük jembitsü melunga lir: India

New Delhi, August 25 (Agencies): Pakistan-i maneni Kashmir onük jembitsü atema India jaok, ajisüaka ibaji magizüki India-i, arrtsülen kiralongraba onük jembitsü melunga lir, ta shiogo.
August 19, 2016 nü shidi ka ajanga Pakistan Foreign Secretary, Aizaz Ahmad Chaudhry-i tan ita tatemlen India-i Islamabad semdanga Kashmir mangatettep onük jembitsü atema jaok, ajisüaka shidi ka ajanga telangzüba agüja India Foreign Secretary, S Jaishankar-i, India indang tongtibang onük- Pakistan arrtsülen nungi kiralongraba onük dang jembitsü melunga lir, ta metetdaktsü.
Osang ka ajanga angazükba agi, Jaishankar-i züluba shidiji yashi Indian High Commissioner, Gautam Bambawale-i Chaudhry nem agütsü.
Kasa shidi nung Islamabad-i ozüng alema Pakistan-occupied-Kashmir (PoK) agia alibaji tekaratiba nung azüngtettsütsü nüngdak, ta shia lir.
Tesüiba anogo ter tsüngda Chaudhry-i India dangi shidi anaben tashi züluogo, aser pai  August 19 nü züluba shidi nung Jaishankar dang tan ita tatemlen Islamabad semdanga Jammu & Kashmir mangatettep keno jembitsü jaoka lir.
August 15 nüa shidi ka ajanga Pakistan ketdangseri Kashmir onük jembitsü atema  Jaishankar jaoka liasü.
Pakistan-isa India dang Jammu & Kashmir nung meimchir temeten anema inyakba mapatem tangsa anentsüla aser yirua alirtem nem medical teyari agütsütsü atema doctor tem aser paramedics arutsü atema temelaba agütsütsüla, ta shidi nung shia lir.
Kashmir nung rara adokba ajanga tang linük ana tsüngda tesentaktep kanga mejungi aliba mapang ka nung linük ana tsüngda shidi züluteper.