Arrtsülen raratsü atema mitkartem renema alitsüla: Rawat

New Delhi, March 23 (Agencies): Tanü Brihostibarnü Army tongti, General Bipin Rawat-i, linük arrtsülen raratsü atema armed forces renema alitsüla aser mitkartem atema advanced technology-a renema atatsüla, ta metetdaktsü.
Linük tenüng metetshii Rawat-i, India-i rara tapu aika maneni ajurutsü, anungji item ama tayongzükba atema armed forces renema alitsüla, ta ashi.
Anogo ananü Military Communication senden nung jembidang Army tongti-i, “Asen arrtsülen raratsü atema armed forces renema alitsüla,” ta ashi.
Kasa sentong nungsa Minister of State for Defence, Subhash Bhamre-ia, armed forces-i nüngdakbatem agutsütsü atema sorkari melunga lir, iba den külemi information technology ajangaa mitkartem nem tashi taliba agutsütsü, ta ashi.
Rawat-isa armed forces nem memenoi technologies tasentiba agutsütsüla, ta ashi.
“Onoki armed forces atema technology tapet asadangtsü aser ibaji tendangba inyakyim memenotsüla,” ta Rawat-i ashi.
“Armed Forces atema Communication technology ji tongmelang, tepungba aser anepalua amshitsü atema tezüba asutsüla, kechiyong itemji arrtsülen rara nung nüngdaktsü,” ta paisa ashi.