Arshad Warsi küm asem tashi film nung shilem agitsü asoshi maongka mangu

Mumbai, February 13 (Agencies): Actor Arshad Warsi, mezüng film ‘Tere Mere Sapne’ nung kanga takok ngua shilem agiba sülen Seher aser Munna Bhai MBBS film tem nung shilem magi tsüngda küm 3 shi mapa kecha mongui liasü, ta pai ashi.
Warsi, shiba nüngtugu film Waisa Bhi Hota Hai, Ishqiya aser Jolly LLB tem nung shilem agi, pai ashiba agi item takoktem ajak pa kinungtsü Maria Goretti-i tia ajak nung nungita yarib ajanga liasü.
“Ni mezüng film yangluba sülen ajaki tenüng sanga agizük, saka iba sülen film ana asem tashi meyangluteti anenba sülen ni mapa kecha mongui liasü. iba sülenjiang Waisa Bhi Hota Hai, Seher aser Munna Bhai nung shilem agi. Ni küm asem tashi mapa kecha mongui liasü. Tia kaa kinungtsü Maria mapa ka nung inyaka liasü, anungji iba ajanga bill tembo ajak agüja anisüngzüka liasü. Ni mapa tangabo inyaka liasü saka film bo ka danga meyanglu,” ta Arshad-i osangbenertem dang ashi.
Arshad-i ashiba agi, pai akokba mapatem tashi inyaka liasü, aser pai pa dak aliba sempet dak tamang kateta liasü. “Nai kechi inyaktettsü aji memetetra na shisabulua dang alitsü, saka nai kechi inyaktettsü aji jangja lira tangaria mapang tatsüka tsüngda nung aji reprangtettsü,” ta paisa shisem.
Küm 48 tain actor-i nisungtem shirnoki pei sasa tajung aser sempet lir ta sayutsü asoshi sen crore aika intoker, parnok asoshi jashia bilemba lemsatep. “Item amala nisungtem film ka ana nung shilem agitsü aser iba sülenji nisungtemi parnok dak sempet maliba ajitettsü. Item amala nisüngtem shisabulutsüla. Nibo kodanga shisabulua maliasü. Ni mezüng film yangluba sülen ni inyaktettsü ta temulung lema liasü,” ta pai shisem.
Taruba film ‘Irada’ koba tan ita 17 nü sayatsü ali, iba ya Bollywood nung ‘ecology’ dak ajemdaker yangluba mezüngbuba film asütsü. Iba film nung Arshad den külemi Naseerudin Shah-i shilem agitsü, aser Aparnaa Singh-i direct asütsü.