Article 371 (A) ya kechi ?

Tang ya Nagaland nung India temzüng arla 371 A indang ya tejembidak lir, kechiyong India temzüng nung iba arla yabo Nagaland state atema kenyongi balaka lateta yutsüba temeten ka lir. Iba arla ya Nagaland state akümtsü atema 1959 aser 1960 küm India government den jembidang onük 16 ( 16 Point) renemba nungi agizüka temzüng küma latetba arla ka lir. Atangji, Naga nungertemi kodanga India kübok melinü aser melinür saka India government-i India sepaitem nem Naga nunger yimtsüngtem rongdokja reshikangshi marem Nagaland state aküm. Aji oda, nüjiso melen amai Naga nunger nem India temzüng arla 371 A nung ya tangar state-tem dang nungibo kanga agia temeten tuluba agüja lir. Iba arla nung shia aliba agi, iba temzüng ( Indian constitution) nung liakasa, (a) Parliament nung latetba ozüng kecha agia, Nagaland Legislative Assembly nung pangzüng ka ajanga melatetra, item temeten dak aketba onüktem  ya mapa küma inyaktsü makok ; (i) Naga nunger tamangba yimsü aser loktiliba nung benshiba sobaliba, (ii) Naga nunger sobaliba temzüng ozüng aser inyakyim, (iii) Nübortem madak yimsüsüba aser Naga nunger Customary law dak ajemdaker obendang agütsüba telemtetbatem, (iv)  Ali aser yangji aliba rongsen madak kibur akümba aser belendokba (transfer). India parliament nung latetaka, Nagaland Legislative Assembly nung melatet tashibo mesüra agizüka pangzüng küma merenem tashibo India parliament nung latetba jagi Naga nunger tamangba yimsü, sobaliba temzüng ozüng, Naga Customary law, ali aser idakji aketba rongsentem ajak madak kibur akümba temetentem agientsü makoktsü. Tatishitsü agi, Indian parliament nung India nung alirtem ajak Hindu yimsü amangtsü ta temzüng ozüng küma latetaka, ibaji Nagaland legislative Assembly nung benoka jembir pangzüng küma melatetra, Nagaland nungbo parliament nung latetba ozüngji mapa küma meinyaktettsü. Iba kasaji, parliament nung India kübok aliba ali aser yangji aliba rongsentem ajak center government meyong asütsü ta latetaka, iba ozüngjia Nagaland Legislative Assembly nung benoka jembir pangzüng ka küma malatetba tashibo Nagaland nungbo mapa küma inyaktsü iba arla 371 A agi memelar. Aji oda, tatishitsü agi, state ajak nung assembly mesüra municipal mesüra Panchayat nung tetsürtem nem menden 25% shiteta yutsütsü ta parliament  nung latetaka, India temzüng nung Arla 371 A ya ali tashibo, Nagaland assembly nung parliament nung latetba kasa onükji benoka pangzüng küma malatet tashibo mapa küma mamshitettsü. Angatetdaktsünüba, yangi tatishitsü aika amshia linük temzüng arla 371 A nung Nagaland nung alir Naga nunger nem tashi aser temeten agütsüba indang ashitsü merangogo. Atangji, linük temzüng nungbo Nagaland nung alir Naga nungertem asoshi iba tashiji temeten wazüka yuja lir, ajisüaka iba jagi tagitsü küma amshia aotsübajibo Naga nungertem dak keta lir. Aji oda, asenok nem temeten balaka wazüka yuja lir ser nung sobaliba dak aketba ken o tilaka tashi senotsü endoka supreme court tashi nung benoka jembidaktsür. Iba kasaji tang Urban Local Bodies  nunga tetsürtem nem menden balala shiteta yutsütsübaji India temzüng nung liaka, Nagaland Legislative Assembly nung benoka jembir pangzüng küma melatet tashibo mapa küma meinyaktettsü. Arla 371 A nung Rural mesüra Urban indang kecha shia mali saka Naga nunger tamangba yimsü, sobaliba, loktiliba aser ali rongsen indang dang shia lir. Tetezü, iba temetenji Naga nunger urban aser rural nung alirtem ajak atema kasasa agüja lir. Aji oda, tetsürtem nem yimten nung shilem agidaktsütsü asoshi shilem balaka wazüka yutsütsübajia India parliament aser India temzüng mulung masü saka Nagaland Legislative Assembly mulung ta asenoki angatetdi. Ano, iba dakji alaka Nagaland Legislative Assembly nung latetba pangzüng ozüngjia yangji amener tatar 60 kija mulung masü saka nübortem mulung, anungji nübortemi mulungba nung latettsüla. Iba amaji ka mesüra, Nagaland Legislative Assembly nung latetbajia mapa küma meinyaktettsü.