Artsü matsüdangtsü !

Nagaland state nung India o Myanmar na tsüngda artsüdanga atsü meyanglutsü asoshi India sorkar dang shipet shidagi ta Nagaland chief minister, T.R.Zeliangi tang oa pa Myanmar nung amongdang, yangji alir Naga nunger lenirtem dang ashiba o ji Naga nunger Myanmar aser India nung alirtem ajak atema kanga tongtibang asütsü. Atangji, külen Pakistan, külen Bangladesh aser külen Myanmar len nungi kiralongrar aser telongpurtem telok balalai India nem timtem lendong agütsür. Ibayongji, arrtsü adena mashi mesenzütettsüsa atsüdanga yuner, ajia shitak. Ano, külen kiralongrarsa mesüaka alima tajungba bushia talisa Bangladesh len nungibo ayangtsü pur telok telok anogo shia Assam ajanga asen lima tonga arur. Anungji, itemji nokdangtsü asoshi India government-i artsü nung atsü yokner aser ilenjibo yokdagi. Ajisüaka, asenoklen yabo tang India aser Myanmar na tsüngda telongpur telok kar jenoka aliba agi itemji nokdangtsüba kuli kija agibo alima ana tsüngda atsü atsütsübaji nüngdak madoker. Ajisüaka, atsü masü saka kin o kin na tsüngda aser asenok nübortem rongnung tangatettep dang nüngdaker. Talisa, Myanmar nung tang India artsülen telongpurtem jenoka aliba tesemtemji asenok Naga nunger lushitem, anungji alima kin balala kübok süaka menguteptsüsa aser majuruteptettsüsa kinunger aser adianutem tsüngda atsü atsüdanger alitsübaji tim masü. Atangji, asenok India kübok alirtema tangar memenep kanga timtem tia nung lir saka ano Myanmar nung alir Naga nungerbo aika shiruru tia nung lir. Parnokji nisungchi kümdakja anepalutsübaji asenok Nagaland nung alir Naga nunger mapa asütsü. Akhidang, asenoki Myanmar tashi moutetaka, Nagaland kübok anüdoklen aliba tesüsaba yim tashibo oagi Yisu osang tajung den kaketshisatsü agütsüogo. Atangji, iba miji tanü tashi mesepi lir aser tang ya iba milakji jangruloka aoba mapang ka asütsüla. Ano, tebilemtsü kaji, Myanmar nung aliba Naga nunger Khristan-tem aikati Yisuji shibar memetet ser kangshia amangdaktsüba purtem lir. Anungji, yimtak tenla ki alitsüa akok aser tamangertema alitsüa akok saka shitakba nungbo parnokji Khristan masü kechiyong parnoki tzüsenba tetezü aser Yisu indanga junga memetet. Iba tia nungji asen kinunger Myanmar nung alirtemji lir. Itemji tonga oagi shi temang aser tanüla taküm yaritsübaji asenok mapa asütsü. Aji oda, tang ya asenok o parnok na tsüngda atsü atsüdanger alitsüba putu masü saka gari lenmang dena tuluba aser tajungtiba lapoka yur yariteptsüba mapang lir. Taoba 20th century tashi nung Nagaland nungi yimsüsürtem oagi Myanmar nung yimsüsürtem ajurua Naga nunger tebilemtsütem indang jembiba kangabo mali asü saka tang putu tasenba nung ajak tia ajung, parnok lima nung democracy aruba ajanga Nagaland nungia yimsüsürtem oagi parnok den Naga nunger tebilemtsü lemsatepteter. Ibaji Nagaland nung alir yimten yimsüsürtem asoshi takok ka asütsü. Aji oda, Naga yimten tebilemtsü tatem küma telatetba kati arutsü teimla nung külen India den aser ano külen Myanmar den Nagaland nung yimsüsürtemi jembibaji ajak atema kanga tongtibang mapa asütsü. Ajaki shisabolua bilemba kaji, India den Naga yimten tebilemtsü tatem küma latetyonga Myanmar len nungi timtem angutsü, ano Myanmar den Naga yimten tebilemtsü latetyonga India nungbo timtem shisabolu manentsü. Iba ama tia tensa ka nung Nagaland nung alir yimsüsürtemi nükenbelem arema alima anaprongla den jembia Naga nunger yimten tebilemtsü latettsü asoshi inyktsübaji mapang tongtibang ka asütsü. Atangji, timtem magütsüdaktsütsü asoshi India-ibo kin ana tsüngda ya atsüang atsüdangner, saka kechisüdir süaka Naga nunger o Naga nunger tsüngdabo atsü atsüdanger malitsüla. Shidi süra, nisung kaji koba lima nung lidir liang, iba limaji teyari angutsüsa litetra ojang. Iba tangatetba nung asenok khen asentenshir artsü adena teyari aser osangtajung bener aotsü mulungtettsüla. Iba ama mapa jagi asenok tsüngda arrtsü kecha mali kümadoktsü anungji külemi lia sademsadema Tsüngrem mapa inyaktettsü aser nübortema yaritettsü.