Arun Jaitley aser P Chidambaram nati Economics memetet: Swamy

New Delhi, April 01 (Agencies): Tanü BJP lenir aser Rajya Sabha MP, Subramanian Swamy-i, Union finance minister Arun Jaitley aser taoba Finance Minister, Chidambaram nati Economics memetet, ta ashi.
Zee News’ India Ka DNA conclave nung jembidang Swamy-i, taruba Lok Sabha election nung BJP-i takok angutsü, ajisüaka tesüiba küm pongu nung rongsenkettsüng mapatong kar agi ni melung masür, ta ashi.
“Finance Ministry-i India nunger rongsenkettsüng atema benokba mapatong kar agi ni melung masür. Demonetisation tangatetba junger, ajisüaka iba mapatong junga mebenok. Tang tashi saru aika lir aser iba mapatong tejangja masü. Jaitley (Union Finance Minister Arun Jaitley)-i Economics memetet,” ta Swamy-i ashi.
Maneni Jaitley indang asüngdangba langzüdang Swamy-i, “Ni Arun Jaitley memeimer. Ni pa memetet. Economics memetetaka Finance Minister akumer aika lir. Jaitley aser Chidambaram na ya economists masü. Economics meteta alir Finance Minister ji Manmohan Singh liasü. Economic tsütsü Jaitley-i tamakok nguogo,” ta ashi.
Taruba Lok Sabha election nung BJP-i takok angutsü, ta shia Swamy-i, “2019 küm Modi-i tanaben sorkar tashi angutsü. Pa den tokteper mali. ‘Brand Modi’ dang nungibo BJP’er Hindutva aser linük meimba tuluba, aser ibaji ajanga 2019 küm party-i takok angutsü. 2014 küm nunga ‘Brand Modi’ maliasü, iba ya osangbenertemi puratetba dang lir,” ta ashi.
2014 küm BJP manifesto nung Ayodhya nung Ram tekülem ki yanglutsü, Arrla 370 agientsü aser Uniform Civil Code benoktsü atema nangzükba dak sendakba nung tasüngdangba ka langzüdang Swamy-i, itemji mapa küma inyaktsüsa süra Congress-i masü saka BJP-i inyaktsü, anungji nüburtemi ano BJP sorkar shimtsüla, ta ashi.
Kasa sentong nung Congress Tir Rahul Gandhi aser UPA Chairperson, Sonia Gandhi na aija Swamy-i, Rahul aser tetsü, Sonia Gandhi na National Herald ken o nung tai tonglokja lir aser tang bail nung lir; Rahul Gandhi-i M.Phil nung tamakok angu aser pa indang chichiba tenüngbo Raul Vinchi lir, ta ashi.