Arun Jaitley-i Kerala nung RSS tasür kibong semdang; CPM züngsemtemia Jaitley dang parnok kibong semdangtsü akhang

Thiruvananthapuram, August 6 (Agencies): Kerala kübok Thiruvananthapuram nung tawa Rashtriya Swayamsevak Sangh (RSS) züngsem ka tepsetba kibong tanü Union Minister Arun Jaitley-i semdang.
Nisung kari arishi küm 34 tain Rajesh Edavakode teka alangdoktsü aser pa mozükidang asü. Tawa Kerala nung CPM aser RSS teloktem tsüngda yimten tsütsü mepetmesü adoka raraba mapang pa tepset.
Tanü Jaitley-i RSS züngsem ki semdangba anema CPM züngsemtemia parnok züngsem kibongtem semdangtsü takhangba agütsü.
“Ni asür karyakarta Rajesh’er kibong den ajurutep. Pa ya kanga mejungi tepsetogo. Pai shinga anena meinyak saka cinema nung anguba ama pa mang nung zübo 70-80 shi keta liasü” ta Jaitley-i osangbener dang ashi.
Pa teseptba nung onok den toktepba yimten telok nungi züngsemtem dena lir aser state sorkari ozüng alema mapa inyakba mazüokteter, ta paisa shisem.
“Nübortem taküm libaliro tajungba kümdaktsütsü, tensa junga ayutsü atema sorkartem shimer, saka tesüiba ita ishika atalokbatem ajanga ozüng alema mapa kanga inyakba kuki sayur” ta Jaitley-isa metetdaktsü.
Left-i aniba state sorkari tanü Thiruvananthapuram nung party ajak senden ka ayonga amen aser idangji CPM-i Arun Jaitley aitsü.
Ano külen, CPM nungi MP, MB Rajesh-i pa indang Facebook account nung, “Kerala mesüra nür teloki sorkar ketdang asüba Uttar Pradesh mesüra Madhya Pradesh mesüra Gujarat nung ozüng alema mapa inyakbaji statistics ajanga kuli sayur” ta metetdaktsü.
July 18, 2017 nü UP state assembly nung tasüngdangba ka langzüdang, Yogi-i aniba BJP sorkar kümteter ita ana tsüngda nisung 729 tepsetba aser tetsür 803 dak tashiyim agi shi nung medemba osang metetdaktsüogo. Ajisüaka, iba atema media-i ola madoker aser BJP-i sorkar ketdang asüba state tem atema zübazüba yutsür, ta Rajesh-isa ashi.
Yimten tsütsü ajemdaker amak ta temulung melemi bilemba nisung 21 kinungertemi tanü Kerala Angh’er kima nung lungkak aitba sentong ka agi aser parnoki Arun Jaitley-ia parnok ki semdangtsüla ta takhangba agütsü.
Edavakode ji nisung telok kati tepset aser iba telokji CPM den sendaktepa lir ta BJP aser par kibongi tai tongloktsür. Ajisüaka, police-i ashiba agi, nija mangatettep ken o ajanga asür Edavakode ji amakba lir ta ashi. Iba tatalokba atema Lok Sabha nung mepetmesü adokogo.
State Crime Records Bureau ajanga ashiba agi, Kannur nung 1991 nungi CPM züngsem 45 aser RSS-BJP züngsem 42 tashi yimten tsütsü toktepertemi tepset. NDTV-ia police records reprangdang, 2006 nungi Kerala nung CPM züngsem 50 aser RSS züngsem 44 tashi tepsetba ngutet.
“Feb 2016 nungi July 2017 tashi CPM züngsem 4 aser RSS/BJP züngsem 10 tashi tepset” ta police record nung zülua lir.