Arun Jaitley-i Rahul Gandhi ajuru

New Delhi, November 18 (Agencies): Bodhbar nü BJP lenir aser Union Finance Minister, Arun Jaitley-i Congress tatong Tir Rahul Gandhi ajuruogo, ajisüaka Parliament senden tenzüktsü hopta ka shi lia Union minister-i Congress lenir ajuruba mapang kechisa jembi’ar iba osangji Congress-i memetetdaktsü.

Tawa Jaitley-i party balala nungi lenirtem ajurua, taruba ita par jala kiyimba benjung nung adentsü atema jaokdar.

Anogo ishika tejaklen Jaitley-i, pai Congress party aser party lenir Rahul Gandhi ajurua taruba Parliament nung Goods and Services Tax (GST) Bill agizüktettsü atema jembitsü ta metetdakja liasü. Iba bill ya Congress-i anir opposition-i anema noktakba ajanga parliament nung magizükteti lir.

Party osang ajanga angashiba agi, Jaitley-i Rahul Gandhi ajurubaji pelaa agizüker, ajisüaka GST Bill atemabo sorkari Parliament House ana nung Cogress lenir ana- Lok Sabha nung Mallikarjun Kharge aser Rajya Sabha nung Ghulam Nabi Azad na den jembitsüla, ta shiogo.

Taruba Parliament senden kanga sashia agitsü ta angateta Centre sorkari yimtenren party balala nungi lenirtem den jelia tongtibang bill tem indang jembitsü telemtetba agia liasü.

Taruba Parliament senden November 26 nü nungi tenzüka akatsü aser senden nung anünga aliba tongtibang bill aika benoktsü sorkar tebilemba lir.

Tawa Bihar election nung JD(U)-RJD-Congress teloktepi BJP madak takok anguba sülen opposition party temi taruba Parliament senden nung linük nung akhümtsübutep maliba onük nung sashia noktaktsü tebilemba lir.