Arun Jaitley-i state finance minister tem ajurutsü

New Delhi, July 24 (Agencies): Mongolbarnü Union Finance minister, Arun Jaitley-i state finance minister tem ajurua GST Bill indang jembitsü; iba bill ya Lok Sabha nungbo agizükogo ajisüaka Rajya Sabha nung magizükteti lir, ta tanü ketdangser kati ashi.
Tan hopta Jaitley-i Bihar chief minister, Nitish Kumar ajurua Goods and Services Tax (GST) Bill indang jembiogo aser Congress party lenirtem dena jembiogo.
Jaitley-i Empowered Committee of State finance minister tem den jembiba sülen GST bill ya Rajya Sabha nung benoka jembitsüa akok.
Hokolbarnü Rajya Sabha nung Parliamentary affairs minister, Mukhtar Abbas Naqvi-i, taruba hopta senden nung GST Bill onük benoka jembitsü, ta metetdakja liasü.
Hombarnü nungi tenzüka tzüngluruwa senden kadar aser Parliamentary affairs minister Ananth Kumar-i sangdong ka ajanga: “Rajya Sabha nung iba Bill nung o lemteptsü atema Business Advisory Committee-i ghonda pongu lemzüktsüogo,” ta ashi.
GST Bill ya yaküm Lok Sabha nungbo agizükogo, saka NDA sorkar züngsem peria maliba, Rajya Sabha nungbo magizükteti lir.
Taoba ita Kolkata nung state finance minister tem senden amenba sülen Jaitley-i, Tamil Nadu dak alaka state ajungai GST bill agizükogo mesüra pusemogo, ta metetdakja liasü.