Arun Jaitley-i ‘Super 30’ ngutetsang Anand Kumar tushi

New Delhi, July 16 (Agencies) : Honibarnü New Delhi nung sentong ka ayongzüka Finance Minister Arun Jaitley-i, ‘Super 30’ ngutetsang Anand Kumar nem akhümket sempet, IIM Lucknow National Leadership Award-Lakshmipat Singhania agüja tushiogo.
Ongko nung mongin Anand Kumar-i 2002 küm nungi tenzüka Super 30 ajanga kaketshir tangar memenepertem noklang aika IIT (Indian Institute of Technology) nung maongka agitettsüsa inyaktetba atema pa nem iba sempet tulu agüja tushi.
Super 30 agi sensaker kaketshir tekolok tajung aser tangar dang mark timba angur nisung 30 shimteta IIT atema renemtsür.
“Ibai ni asoshi tetushi ulura. Iba ama sempet tulu angu shia sempet dak alang kü teinyaktsü tuluba akümer. Sempet tulu anguba ajanga kanga ajungmesor aser ni ano tejangraba tulu nung meranga inyaktsü,” ta Kumar-i osangbenertem dang ashi.
IIM Lucknow-i küm shia inyakyim balala nungi alakteta ajungertem nem iba sempet ya agüja arur.
Iba sempet ngur alirtemji tesüiba mapang Wipro nung tekolakba Azim Premji, Infosys tekolakba N.R. Narayana Murthy aser Tata Group nungi Ratan Tata nunger lir.