New Delhi, October 27 (Agencies): Mongolbar nü Ato kilonser Narendra Modi’er sorkar aitsüsang, Arun Shourie joko party züngsem masü ta tanü BJP-i sangdongogo.
Mapang ka nungbo party nung kanga tongtibang lenir aser taoba NDA sorkar nung minister Arun-i aitsüba onüktemji tai ta BJP-isa shiogo.
BJP general secretary Arun Singh-i, tawa membership drive mapang Shourie-i pa indang züngsem renew masüba sülen pa züngsem anenogo, ta ashi.
Züngsem ajaki küm trok shia membership renew asütsüla, aser tanbo Shourie-i aji oda meinyak, ta paisa ashi.
“Arun Shourie ya joko BJP züngsem ka masü. Pai pa membership renew masü,” ta Arun-isa metetdaktsü.
Party headquarters nung osangbener senden ka nung jembidang Union minister Venkaiah Naidu-i, Shourie-i sorkar aitsübaji tai lir, pa tangatetba otemji party-i menungiter aser nüburtemia magizüker, ta ashi.
“Ni iba nung ya hau masür. Iba ya party mesüra nübur tangatetba ka jembiba masü,” ta paisa ashi.
Yaküm Lok Sabha election mapang Narendra Modi ajang ajanga pusemer Shourie-i, “Centre sorkari osangtsüsang prokshibaji linük rongsenkettsüng maparen inyaker ama bilemer aser ibaji ajanga nüburtemi taoba Ato kilonser Manmohan Singh’er sorkar bilemteter,” ta ashi.
“Sorkar indang mapatongtemji- Congress (UPA sorkar) den kasa, nashi kati dang timba,” ta Arun Shourie-isa ashi.
Iba taitsüba dak sentakba nung Naidu-i, “Sorkar kübok ochimashi mali aser aibelen ka danga mali aser linük ajungalen BJP-i takok ngua arudar,” ta ashi.
“Asenok ya loktiyimten linük ka lir, pa-a (Shourie) pa tangatetba lir, ajisüaka linük tangatetbaji balaka,” ta Naidu-isa ashi.
You must be logged in to post a comment Login