Arunachal anasa IAF chopper lendong nung nisung 7 asü

New Delhi, October 06 (Agencies): Hokolbar anepdang Arunachal Pradesh anasa Tawang nung Indian Air Force (IAF) indang helicopter ka tsükokba lendong nung tayimtsü nung mena alir Air Force sepai tenetprongla asü.
Mi-17 V5 chopper ji air maintenance mission atema apusoba sülen tanep 6:00 ako meta anünglen feet 17,000 nung lia tsükok, ta Air Force osang ka ajanga metetdaktsü.
Iba helicopter ji Army camp ka nung kerosene abenba pongdang tsükdaktsütsü atema Yangtse-i aoba mapang iba lendong atalok.
China den arrtsülen tayimtsü tsükokba tesem nungji pilot, co-pilot, flight engineer aser army ketdangser ana densema tasümang tenetpronglaji rongsar angu.
“Kerosene abenba pongdangji ka lapoker helicopter tesülen bangka nung kongshiba ajanga mi adok,” ta Air Force ketdangser kati ashi.
Iba lendong nung asürtem rongnung- Wing Commander B Upadhyay, Squadron Leader S Tiwari, Master Warrant Officer AK Singh aser Sergeants- Gautam den Satish Kumar aser army ana- HN Deka aser E Balaji nunger liasü.
Iba tatalokba kuli bushisüngdangtsü atema tuyuogo.
Tsüngsang-mopung majungba ajanga Arunachal Pradesh nung helicopter lendong aiben ajurua arudar.
Taküm July ita nunga tzümetsüng lendong mapang kümzükba maparen inyakdang IAF indang helicopter ka tsükoka nisung pezü asü; Taküm küm tetenzüklena Sukhoi-30 jet ka Assam-Arunachal arrtsülen tsükokba lendong nung IAF pilot ana asü.
Russian-made Mi-17 V5 chopper ya Indian Air Force atema kanga tongtibang tayimtsü ka lir.
Tang Mi-17 V5 chopper 150 dak tema tamshidak lir aser 48 dak tema ano alizüktsü atema jembia lir. Mi-17 chopper ajanga anünglen talang nunga khu kanga taret benteter aser gol kanga tashi itter.
Air Force Day benjungmong atongtsü mapang ka nung tanep iba lendong ya atalokogo.
Yashi osangbenertem senden ka nung jembidanga Air Chief Marshal, BS Dhanoa-i tawa tayimtsü aika kanga bulua tsükokba indang jembia liasü.