Arunachal Angh agientsü atema Tir-i kuli meshir

New Delhi, September 11 (Agencies): NDA sorkari Arunachal Pradesh Angh, Jyoti Prasad Rajkhowa agientsü atema Tir, Pranab Mukherjee matsüngdanga benokogo, ajisüaka tang tashi nung Tiri telemtetba agia mali.
Taoba hopta Union home minister, Rajnath Singh-i Tir, Pranab Mukherjee ajurua  Arunachal Pradesh tensa lemsatepdamg pai, Centre-i Rajkhowa dang Angh menden nungi anentsü asüngdang, ajisüaka pai memelunger ta shiogo, ta osang ka ajanga metetdaktsü.
Tiri dang melungra Angh-i pa office nung maneni inyaktsü akok, ajisüaka council of minister temi benokra Tiri Angh agientsü akok.
Rajkhowa agientsü atema sorkari benoka mali, ajisüaka Singh-i iba onük nung Tir tangatetba metetnüa ajuruogo.
“Ajisüaka home minister-i ajurudang Tiri, kechi kulitem nung ajemdaker sorkari Rajkhowa agienner ta maneni osang tejangja meshiogo,” ta sorkar tongti ketdangser kati ashi.
BJP-i aniba sorkari UPA sorkar mapang shimba Anghtem agientsü telemtetba agiba nung Tir, Mukherjee-ia melung agienogo. Rajkhowa ya NDA sorkar mapang Arunachal Angh inyaktsü atema shimba lir.
Rashtrapati Bhavan osang ka ajanga ashiba agi, “Angh agientsü atema kulitemji Tiri meshiogo. Anghtemji Tiri shimmer aser agiener. Iba onük nung Union home ministry-i o aittsü mali.”
Rajkhowa ya taoba mapang Assam nungi IAS officer lir aser 2015 küm May 12 nü pa Arunachal Angh shima liasü.
Rajkhowa-i Arunachal nung Tir yimsüsüba alitsü benoka liasü, ajisüaka tesülen Supreme Court-i ibaji agien.
Supreme Court-i state nung Centre yimsüsüba benokbaji temzüng den mapet ta obendang agüja Congress nem tanaben sorkar tashi agüja liasü.