Arunachal aser Mizoram kaketshirtemi Rijiju den ajurutep

Itanagar, Tsüklai 02 (Agencies): Arunachal Pradesh aser Mizoram nungi kaketshirtemi New Delhi nung Union Minister of State for Home Affairs, Kiren Rijiju den ajurutep.
Arunachal Pradesh nungi kaketshir 16 rongnung tetsür 8 aser tebur 8 dena lir. Parnok ya Aenjeti 27 nungi Tsükali 8, 2018 tashi national integration tour senzür. Iba sentong ya Indian Army nung Sikh Light Infantry-i ayongzüka agir, ta PIB sangdong ka nung metetdaktsü
Kaketshirtemi New Delhi nung Connaught Place, Qutub Minar aser Metro rail semdangogo aser maneni parnoki Agra aser Dehradun semdangtsü sentong lir.
Yashi Kiren Rijiju-i kaketshirtem den ajurutepa sensaksemdang shisaluyimba nung temulung agütsütsü ayongzük.
Meranga inyakba nung takok lir aser kaketshirtemi literary activity tem nung shilem agitsüla, ta pai-sa ashi.
Ano, Mizoram kübok Champhai nungi kaketshir 18 telok kati kasa anogo nung Rijiju den ajurutep.
Mizoram kaketshirtem atema National Integration Tour ji Aenjeti 21 nungi tenzükba lir aser Assam Rifles-i ayonga agir.
Kaketshirtemi Red Fort, Jama Masjid, Parliament House, Connaught Place, Qutub Minar aser Delhi metro tem semdang.
Mizoram nungi aoba kaketshirtemisa Republic Day parade reprang aser India Tir Ram Nath Kovind den-a ajurutep.
Kaketshirtem pela agizükba sülen Rijiju-i Assam Rifles nem tenüngsang agütsü.