Arunachal, Assam-M’laya arrtsülen AFSPA atsülangshir

New Delhi, November 10 (Agencies): Centre-i Arunachal Pradesh nung ita trok aser Assam-Meghalaya arrtsülen kilometre 20 tashi nung küm ka atema Armed Forces (Special Powers) Act alitsü mapang atsülangogo, ta home ministry sangdong ka nung metetdaktsü.
State sorkartemi AFSPA marudaktsütsü atema temepishiba agüja liasü ajisüaka November 4 aser 5 nü iba tetuyuba agütsü.
National Socialist Council of Nagaland (Khaplang) NSCN (K), National Socialist Council of Nagaland (Khaplang-Kitovi) NSCK (KK) aser National Socialist Council of Nagaland (Reformist) NSCN (R) den United Liberation front of Assam (Independent) ULFA (I) aser National Democratic Front of Bodoland (Songbijit) NDFB (S) telungpur kanga buluba ajanga AFSPA, arrla 3 dak ajemdaker item tesem “disturbed areas” ta sangdongogo.
Iba tetuyuba shidi nung NSCN (K)-i Centre den yimjung raksar India army aika taküm lalutsüba tuteta shia lir.
Meghalaya sorkari Meghalaya High Court nung Centre-i AFSPA alitsü tetuyuba agütsüba anema ken o ka benokogo ta metetdaktsü.
Iba onük ya November 18 nü okadak angatsü. November 2 nü Chief Justice Uma Nath Singh, Justice T Nanda Kumar Singh aser Justice S R Sen nungertemi Centre dang Garo Hills nung AFSPA ozüng alitsüla ta tetuyuba ka agütsü aser Meghalaya sorkari ibaji anema ken o benokogo.
State police-i Garo Hills nung GNLA aser tanga telungpur teloktem azüokteta lir, ta yashi Garo Hills nungi telok pungu den ajurutepa senden la alidang Chief Minister Dr Mukul Sangma-i ashi.
Item telok pungui chief minister dang Garo Hills nung AFSPA ozüng malitsü atema takhangba agütsü.
Ano külen, Mongulbarnü North East Students’ Organisation (NESO)-ia Garo Hills nung AFSPA alitsü metemsü ta sangdong ka nung metetdaktsü.
Meghalaya nung AFSPA alitsü ozüng agütsüba magizüker kechiyong AFSPA ya loktiyimten linük ka nung amshitsü memelar, ta NESO chairman Samuel B. Jyrwa-i sangdong nung metetdaktsü.