Arunachal atema cadre balaka akhangtsü

Itanagar, October 19 (Agencies): Arunachal Pradesh Assembly-i Centre dang state atema All India Services IAS, IPS aser IFS cadre balaka tekaratiba nung kümtettsütsü asoshi akhangtsüba atema telemtetba agiogo.
Iba dak sendakba nung Chief Minister Pema Khandu-i ashiba agi, “State kümteter küm 30 ajungba sülen tang ya cadres balaka asoshi akhangtsüba mapang tetemsü lir.”
Paisa ashiba agi, Arunachal dak alaka state ajak pei indang cadres lir. Arunachal ya AGMUT (Arunachal, Goa, Mizoram aser tanga union territories) cadres kübok lir.
“Cadres balaka maliba ajanga central schemes tem state nung kanga junga inyakyonga moteter, kechiyong AGMUT ketdangsertem state nung mapang tatsüka atema dang arua alir aser parnoki Arunachal nunger kin balala sobaliba aser parnok tejangraba o tangatetba mangateter,” ta paisa ashiba den külemi state cadre kübok bendanga agüja inyakba ketdangsertem adokba sülen terenlok adokyonga aotsü.
Maneni Chief Minister Pema Khandu-i ashiba agi, Union Home Ministry, Joint Cadre Authority puri sensaksem ka atema New Delhi nung November 3 nü ajuruteptsü asoshi mapang adakzükogo.