Arunachal atema Centre-i SC nem telangzüba agütsür

New Delhi, January 29 (Agencies) : Hokolbarnü Centre sorkari Arunachal Pradesh nung President’s rule agütsüba atema Supreme Court nem kuli agütsüogo.
Centre-i Supreme Court nem telangzüba agütsüba nung ashiba agi, Arunachal Pradesh nung Congress sorkarji züngsem agi mabensa.
Yashi Arunachal Pradesh Angh, J.P. Rajkhowa-i SC nem telangzüba agütsüba nung ashiba agi, taoba chief minister Nabam Tuki aser par minister temi pa teinyaktsü mapa meinyakdaktsü.
Tuki-i kin nung ajemdaker yimten mapa inyak aser pa menden nungi atsüngdoktsü atema Tuki-i lisopur kintem aser public tem ajungmesoa lungkak aitba sentong agidaktsü, ta Rajkhowa-i telangzüba agütsüba nung shia lir.
Rajkhowa-isa ashiba agi, minister kari pa anema mapa inyak, amokmeren aser teka tera agi dang mesangshi.
Tuki aser pa pusemertemi mapa inyakba ajanga pa aser par kibong taküm lendong ajurutsü ta tsübua liasü, ta Rajkhjowa-isa SC dang ashi.
Arunachal Pradesh nung PR agütsüba anema Tuki-i Supreme Court nung ano ken o tasen ka benokogo.
Arunachal Pradesh nung President’s Rule agütsütsübaji Union Cabinet-i telemtetba agia liasü aser taoba Mongulbarnü Tir Pranab Mukherjee-i ibaji agizük.
Ita trok nung Assembly session khenbosa agitsüba temzüng lateta lir aser Arunachal Pradesh nung iba anogoji tan January 21 nü liasü.