Arunachal BG Line atema Survey tenzükogo

Itanagar, April 02, 2017 (Agencies): Centre ajanga railway line asem yanglutsü asoshi sen crore 70,000 shi indoktsü, koba nung Arunachal Pradesh nung Tawang tashi lenmang ka yanglutsüba densema lir. Iba osang Arunachal nung broad-gauge railway lines asem yanglutsü asoshi tesemtem tatembangba survey agi tenzükdang Minister of state for railways & communication, Manoj Sinha-i agütsü.
Iba survey broad-gauge line asem atema lir- km 378 Bhalukpog-Tenga-Tawang track, 247.85km North Lakhimpur-Bame-Along-Silapathar track aser 227km Pasighat-Tezu-Rupai track.
“Iba project atema ‘Modern survey technique’ amshitsü. Iba survey agitsü asoshi küm asem ser tesadang agitsü aser October ita 2020 tashi nungbo tembangtsü asoshi sentong renema lir,” ta NF Railway ajanga metetdaktsü.
Osang ajanga maneni ashiba agi, iba project nung apu aser tunnel tem talanglang yanglutsü. “Tesemtem tatembangba survey agiba sülenang sen kwi indoktsüar jangjatsü. Iba line asem yangluba nung crore 70,000 shi indoktsü amai bilemer. Iba railway line yangluzükba sülen raliwalirtem asoshi senzüsenpongtsü atema temelaba akümtsü aser shishilembabaren nung tali tejakleni aotsü. Iba lenmangtem ajanga raliwalir mongchen, Tawang aser Parshuram Kund nunger amala tesem tali tesendaktep tajungba akümtsü, koba ajanga tourism sector tali ajungkettsü.” ta NF Railway ajangasa metetdaktsü.
Broad-gauge ajanga state yimtibatem sendaktepba rongnung Northeast state tem rongnung Assam sülenbo Arunachal Pradesh asütsü. Tesem asem survey asüba den bendenloksema ano Arunachal nung ‘reconnaissance engineering-cum-traffic survey’ line tasen 8 atema temelaba agütsüogo. Iba line tasenba ya km 625 asütsü.
Taoba küm asem tsüngda nung broad-gauge railway Meghalaya, Tripura, Mizoram aser Manipur atemaa tenzükogo. Küm asem tsüngda nung ajak senteper state 5 tashi broad-gauge network kübok aniokogo.