Arunachal CM anema tetsür kati ken o benok

Itanagar, Tsüklai 16 (Agencies): Arunachal Pradesh Chief Minister, Pema Khandu densema küm ti tejakdang nisung asemi tashiyim agi taküm raksatsü, ta Arunachal Pradesh indang West Siang district nung alir tetsür kati National Commission for Women (NCW) nem Yangtepnü ken o benok.
National Commission for Women Act indang Section 10 kübok la indang lawyer ajanga ashishitep ken o benokba nung, Khandu den Tawang Higher Secondary School nung tesayur Phurpa Lama Thumpeen Tashi aser Dorjee Wangchu nungeri Chiteni 2008 nung tashiyim agi taküm raksatsü, ta lai aija lir.
“Mapang talangka kü shisatsü nung timtemba sülen parnok anema Itanagar women police station nung ken o benoktsü asoshi ni tasü ita aküm,” ta tetsürlai ashi.
Lai benokba ken o nung shia aliba agi, la ya Arunachal indang West Siang district kübok Dorzeling yimtsüng nung alir aser Tawang district-i mapa bushitsü mesüra mapa mongutet nunga mobile aser laptop amala shishilembaba tenzüktsü sentong liasü.
Lai mezüng Phurpa Lama den ajurutep aser pai la dang Tawang Circuit House nung yimdenyimli nung tashi tait nisung kar ajurutsü asüngdang aser la nem temesepba mozük inoker ‘cold drink’ agütsü aser aji jemer lai kecha memeteti aküm, ta lai NCW nem kuli agütsüba nung shia lir.
“Kü nem temesepba mozü den cold drink meyokteper akütsü aser iba ajanga ni kecha memeteti aküm. Iba sülen tekalen agüja aliba nisungtemi küdak tashiyim agi aiben mapa tamajung inyak. Ni nisung meteta akümba mapang nisung kati küdak mapa tamajung inyaka liasü. Pai pasasa pa ya Colonel Pema Khandu, ta ashi. Ni pa nokdangtsü merangdang pai küdak tashi agi tejak nung ama…” ta lai shia lir.
Lai ashiba agi, Khandu aser tangartem anema ashishitep ken o benoktsü asoshi tasü aittsü küm tenet agi.
Luchii 2015 aser Aenjeti 2016 nung Itanagar Women Police Station nung FRI ana tashi agütsü, saka officer in charge-i item FIR züluoktsü memulung, ta lai ashi. Superintendent of Police-ia iba ken o benokba nung mapa meinyak, aser chief judicial magistrate indang court ajanga iba ken o dismiss sütsü, ta lai-sa shisem.
“Arunachal Pradesh CM Pema Khandu anema tashiyim agi taküm raksatsüba ken o ka ozü client-i benokogo. Ibai 2008 nung atalokba lir. Lai police aser court dang asüngdang, saka la indang ashishitepba ken o magizük. Onoki tetsürtem indang commission nem ashishitep ken o benokogo. Tetsürla ya kanga tsübua liasü aser tsübua lir. Tasütait tetsürlai la indang ashishitep ken o ya Delhi nung National Commission for Women nem agütsüogo,” ta tetsürla indang lawyer, Rashmi Bhati-i osangbener dang ashi.