Arunachal CM-i anir MLA 43 PPA nung aden

Itanagar, September 16 (Agencies) : Hokolbarnü Arunachal Pradesh nung Chief Minister Pema Khandu-i anir Congress MLA 43-i People’s Party of Arunachal Pradesh nung denogo. Iba inyakyim ajanga Arunachal nung yimtenren tebilemtsü tulu ka ajuruogo.
Ita ana tejaklen Supreme Court tetuyuba nung ajemdaker Arunachal Pradesh nung Congress sorkar tanaben tentetdaktsüba mapang Pema Khandu chief minister inyaktsü shim.
Tanü Khandu-i anir Congress MLA 43-i PPA nung aden aser ibaji ajanga tanga aliba sorkarji PPA sorkar kümadok.
Congress MLA tem rongnung Nabam Tuki-i dang PPA nung maden. Taküm July ita Arunachal nung parnok sasep nung mepetmesü adokba sülen Congress ketdangsertemi Tuki dang Chief Minister menden toktsütsü tuyu aser pa melen Khandu shima liasü.
Züngsem 60 agi akümba assembly nung Congress nungi MLA 44 liasü (taoba chief minister Kalikho Pul-i toktsüba menden tazüng lir), BJP nungi 11 aser Independent 2 lir.