Arunachal CM-i Assembly & Secretariat ki mapa shitak nung yangluzüktsü tuyur

Itanagar, February 28 (Agencies) : Küm 10 den timba Civil Secretariat aser Legislative Assembly tasen yangluba mapa metembangtetba atema süoki ia bilema Arunachal Pradesh Chief Minister Kalikho Pul-i ketdangsertem dang mapa lateta aliba tsüngda mapa tembangtsü tetuyuba agütsüogo.
April 20 tashi nung Civil Secretariat aser August 14 tashi nung Legislative Assembly kiojenten yangluzüktsü atema chief minister-i tetuyuba agütsü, ta sorkar sangdong ka nung metetdaktsü.
Taküm September ita agitsü aliba taruba Assembly session ji ki tasen nung agitsü, ta Pul-isa metetdaktsü.
Honibarnü Pul-i Secretariat aser Assembly ki yangluba tesemtem semdang aser PWD o construction agency tem dang anogo latetja aliba matongdang mapa tema inyaktsü tetuyuba agütsü.
Paisa, construction agency tem dang nübo talila anioktsü aser ghonda 8 telemsa nung asemben mapa inyaktsü tetyuba agütsü.
Arunachal chief minister-isa ketdangsertem dang mapa shia mapa inyakba asadangtsü ashi aser ketdangsertemi tim mesüi inyakba putetra ozüng tapet agi merenshitsü ta amokmerena metetdaktsü.
Civil Secretariat ki indang original cost ji 2009 küm Rs 91.86 crore liasü saka 2016 nung Rs 198.56 crore ajungket, ta Chief Minister-isa metetdaktsü.
Assembly building ki atema Rs 51.81 crore aser Rs 119.50 crore tsüngda sendong punguben melenshiba nguogo aser itemji original estimated cost, projected revised cost modified revised cost, amala liasü. Iba atema Chief Secretary nem mapa lemzüktsüogo aser osang bushitetba sülen aibelenertem merenshitsü, ta Pul-isa ashi.
Chief minister-i Principal Secretary, Finance, dang Secretariat aser Assembly kitem atema sen crore metsütsü lemzüktsütsü atema tetuyuba agütsü.