Arunachal CM-i ato kilonser nem angh anema ken o agütsü

Itanagar, Jan. 06 : Arunachal Pradesh Chief Minister Nabam Tuki-i New Delhi nung ato kilonser Narendra Modi ajurua tawa par state nung angh J.P Rajkhowai tatar senden jelia jateptsü merangba ajanga yimten nung timtem adokba indang osang tejangja renemer agütsüogo.
Iba ken o okadak agüja lir aser Gauhati High Court nung angadangogo, ajisüaka angh-i Chief minister aser par kilonsertem dang masüngdangi inyakbaji tim masü ta Chief Minister Nabam Tuki-isa metetdaktsü.
Yashi Tuki-i Narendra Modi ajurua jembidang, angh-isa Congress telok rongnunga mangatettep adokdaktsüsa inyak ta metetdaktsü.
Chief Minister-isa ashiba agi, Rajkhowa-i inyakbaji BJP teloki aniba NDA sorkar kümli ato kilonser Narendra Mdoii Co-operative Federalism indang jembiba tangatetba aser nükjidong anema liasü.
Iba mapang, ato kilonseri Tuki dang par state nung atalokba aser pai angh anema bener aruba ken o ajakji jungjunga reprangdanger tapet mapa inyaktsü ta metetdaktsüogo.
Iba dakji alaka Arunachal Pradesh nung terenlok mapatem inyaktsübaren indang jembidang, Chief Minister-i ato kilonser dang Hollongi nung Greenfield Airport yakta yanglutsü atema aser Disaster Response Force (DRF) battalion ka state nung lapoktsü asoshi metetdaktsü. Iba denji ano High Court lapoktsü aser arrtsülen East West Industrial Corridor lapoktsü nüngdakbatem metetdaktsü.
Tuki-isa tekaratiba nung par state nung tzümetsüng aser alima lendong agi raksatsüba takoksa mapatem reprangdangtsü asoshi central team ka yoktsü asoshi nenshia metetdaktsü.
Kasa mapang nung ato kilonseri tan menoknok anokba indang asüngdanga liasü saka Arunachal Pradesh nungbo iba menoknok ajanga ajuruba takoksa aser teraksa kecha mali asü ta Chief miniteri metetdaktsü.