Arunachal CM-i Citizenship Bill posemer; Manipur CM-i magizüker

Guwahati, January 21 (Agencies): Assam Chief Minister Sarbananda Sonowal-i jembiba sülen Arunachal Pradesh Chief Minister Pema Khandu-ia Citizenship Bill posema jembiogo.
Tajangzük angutsü bushia nisung kari Citizenship Bill tailen meyipzüka osang belenshir aser nübortem ratamadaktsür, ta Khandu-i ashi.
Arunachal Pradesh kübok Seijosa nung Pakke-Paga Festival tenzüktsüdang Khandu-i “nisung kari tajangzük angutsü meranga bill mashilen angateta meyipsar. Iba Bill ajanga northeast litsü tajungba kümdaktsütsü” ta ashi.
Arunachal nung All Arunachal Pradesh Students’ Union (APSU) dena telok aikati Citizenship (Amendment) Bill 2016 anema noktaker.
Parnoki ashiba agi iba bill ajanga Bangladesh nungi aruba refugee tem- Chakma aser Hajong nunger aser China nungi aruba Tibetan nunger nem senso agütsütsü.
Külen, Manipur Chief Minister N. Biren Singh-ibo North East Students Organisation (NESO) lennirtem dang par sorkari tang yanglua aliba Citizenship (Amendment) Bill 2016 magizüker ta metetdaktsü.
NESO Secretary S. Prakash-i anir NESO teshimtet telok kati Biren Singh den ajurutep aser idangji “bill nung northeast nung lisopurtem kümzüka ayutsü ta onük ka meinok tashi Manipur sorkari bill magizüktsü” ta chief minister-i ashi.
Northeast nungi Chief Minister tem aser central lennirtem tsüngda senden amentsü aliba nunga pai Bill magizükba ashitsü aser Manipur Peoples (Protection) Bill, 2018 mulunga agizüktsü atema mepishitsü, ta Biren Singh-isa NESO lennirtem dang ashi.
NESO-i Citizenship (Amendment) Bill 2016 anema northeast kübok state ajak nung lungkak aitba sentongtem ayonga agiyonga arur.