Arunachal CM-i parliamentary secretary 15 shimogo

Itanagar, March 19 (Agencies) : Sorkar mapa tiptema aser tetsükdak meli-i bener aotsü atema Arunachal Pradesh chief minister Kalikho Pul-i Hokolbarnü parliamentary secretaries (PS) 15 shimogo.
Chief minister Kalikho Pul-i Parliamentary secretary tasentem tenangzükba agidaktsü aser iba tenangzükba agitsü asoshi Itanagar Banquet Hall nung sentong ka ayonga liasü. Sentong nung deputy chief minister tem- Kameng Dolo aser Chowna Mein na den speaker Wangki Lowang, MLA tem, civil aser police ketdangsertem dena liasü.
Tan PS tasen shimer rongnung PD Sona aser Tirong Aboh nabo aini oer aliba ajanga iba tanangzüka magitet. PS tasen rongnung nisung anabo independent MLA lir.
PD Sona aser Tirong Aboh na zünga tan shimer PS temji Gum Tayeng, Phosum Khimhum, Tapuk Taku, Jambey Tashi, Tatung Jamoh, Alo Libang, CT Mein, Jomde Kena, Zingnu Namchoom, Mutchu Mithi, Paknga Bage, Punji Mara aser Tsering Tashi nunger lir.
State nung yimtenren tsütsü mangatettep adoka ita ishika animesüngzükteti lir külen, February 19, 2016 nü state atema chief minister 8buba asütsü tenangzükba agisang, Pul-i congress party nungi atsünger alir MLA 29 den külemi March 3 nü nungi Peoples’ Party of Arunachal (PPA) den aden.
Item MLA tem atsüngba sülen state nung Congress MLA 15 dang aküm.
Menden 60 aliba house nung BJP MLA 11 lir aser parnoki tema nungi Pul-i aniba sorkar nungiter. Chief minister-i March 5 nü cabinet ministers 7 aser deputy chief ministers 2 anioksema council of ministers ulushiogo.