Arunachal CM indang ki ‘Guest House’ kümogo

Itanagar, April 09 (Agencies): Arunachal Pradesh Chief Minister aliba ki ya ‘State Guest House’ melenogo aser Hokulbarnü iba ki semzüktsüba sentong agiogo. Iba ki ya sarasademja aser temoatsü meshia semzüktsü.
Temenen tanülai mapa inyaker, ta olulu aliba ki ya raliwalir anenzüktsü asoshi semzüktsüba mapang, tamangba yimsü balala nungi putir aser temeshi nisungtemi takdang ajunga sema temoatsü meshija aser temenen tanüla aridoktsü asoshi sarasadema senzü.
Urban development & Town Planning Minister, Nabam Rebia aser Chief Secretary Shakuntala D Gamlin nungertem iba sentong nung aden.
“Temenen tanüla aridoktsü masü saka ki tasen meshitettsü asoshi item tamangba yimsü balala nungi lenirtem arua meshitetdaktsür. Iba amala sentong ya ki taseni maidang aser project balala metenzükdang tia ajungtsü aser yimjiyimjung alitsü asoshi agir,” ta Rebia iba sentong nung ashi.
“Ni item takzütakpongba nung mamanger aser mamangtsü asoshi ajungshir,” ta paisa shisem.
“Tamangba yimsü balala nungi lenirtemi meshitettsüba ajanga iba ki nung nüburtemi temolung malemba aser tsübua bilembatem ajak samatsütsü imlar,” ta Rebia-isa shisem.
“State Guest House ajanga tarutsü anogotem nung nüburtem nüngdakba peritsütsü. Iba ki nung sorkar mapa nung ketdangsertem training agütsütsü,” ta Chief Secretary-ia ashi.
Niti-Vihar tenemkolak nung aliba Chief Minister indang ki ya 2007-08 nungi yanglu tenzük aser 2009-10 nung renem. Iba ki yangluba nung sen crore 59.55 indok aser taoba Chief Minister, asür Dorjee Khandu-i yimsüsüba mapang renem.
Arunachal Pradesh Chief Minister alitsü yangluba ki nung ita ana tsüngda nisung ana tashi soseta asüba ajanga iba ki ya ‘temenen tanüla aliba ki’ ta nüburtemi jatet.
Iba ki nung taoba Chief Minister, Kalikho Pul soseta sür lia August 09, 2016 nü angu aser kasa iba takdang anasa October 08, 2016 nü inyaker ka soseta sür angu.
Iba lendong ana atalokba aser taoba mapang Arunachal Pradesh Chief Minister Dorjee Khandu aser Jarbom Gamlin-na asüba ya iba kidang temenen tanüla aliba ajanga lir, ta nüburtemi jembir, saka Khandu ya chopper nung tsükseta asü aser Gamlin ya talangka shiranga lir asü. Tenabo iba kidang masü saka tesem balala nung asü.
Iba kidang ammang tiyong nung ola balala adoka temenen tanülai mapa inyakba osang, iba kidang mapa inyakertemi nisung tanabuba soseta asüba mapang metetdaktsü, saka tang tashi kuli tejangja bushiteta mali.
Iba ama lendong balala ajurua aruba ajanga tang teinyakdak Chief Minister Pema Khandu iba kidangi maor südi, ta nisung aikati jembir.