Arunachal CM Pul-i GMS ka nung tesayur ka ama shilem agi

Guwahati, June 13 (Agencies) : Hombarnü Arunachal Pradesh chief minister, Kalikho Pul-i ghonda tesadang ka shi chief minister menden toktsür school tesayur ka ama inyak.
Tanü pai Itanagar jila tiyongtsü nung aliba Government Middle School semdang aser idakji tesayur ka ama “Love for your country” onük nung kaketshir dang senso tajung ka ka akümtsü atema tayongzükba agütsü.
“Nü linük meimtsübaji tongtipangtiba. Hao, nai meranga azüngtsüla aser lesson tem temulung nung ayuba dang masü saka angatettsüla, saka nai nü linük memeimra, nü state memeimra, naji teinyaktsü shitak meinyaker nisung ka asütsü” ta Pul-i kaketshirtem dang ashi.
“Anogoshia shisaliok yimya aser tetoktepba melenshir. Anungji, na class tila nung azüngdang nungi renemtsüla. Talisa, nenoki gutkha amala moko achiba yimyatem nungi jenbua alitsüla. Yimyatsüya tajung benshiang aser medemer tamajungtem nungi pila liang” ta chief minister-isa kaketshirtem ayongzük.
Arunachal Pradesh chief minister-i school nung metsümeshidak tesemtem reprangdang aser tesayurtem dang metsümeshidak merükmejua ayutsü tetuyuba agütsü. Paisa, metsümeshidak tajung maliba school temi education department nem osang sangoktsütsü atema metetdaktsü.