Arunachal Congress-i Chief Minister Khandu aitsür

Itanagar, Mongputeni (October) 22 (Agencies): Confederation of Service Association of Arunachal Pradesh (CoSAAP)-i anir state sorkar mapa inyakertemi lungkak aitba azüoktsü atema state nung “President’s Rule” ozüng benoktsü ta Chief Minister Pema Khandu-i jembiba o Arunachal Pradesh Congress Committee (APCC)-i aitsüogo.
West Kameng district kübok Jamiri nung lokti sentong ka nung Khandu-i iba onük jembi.
“Iba ama onük jembiba ajanga Khandu-i mapa inyakertem indang temeten ajembanger. Khandu ya public-i pusemba melii chief minister inyaker anungji pai President Rule benoktsü jembiba atema mesüngmanger. Pai aniba sorkari nübortemi aginüba ama meinyaktettsü” ta Congress otongdar Mina Toko-i ashi.
“CoSAAP lungkak aitertem ya ozüng alema inyakertem masü anungji Khandu-i parnok mezüngmeshi aser amokmeren masütsüla. State nung tekolak kati yamai tekong meranga jembiba ya tim masü. Chief minister-i lungkak aitertem alenbangtsü merangba ajanga mapa inyakertem aser sorkar nung temaba jenjang nung alirtem tsüngda meputep adokdaktsür” ta Toko-isa ashi.
Chief Minister Khandu-i mapang shia lungkak aitertem dak Central Civil Service (CCS) rules amshitsü ta ashir, anungji pai 7th Pay Commission mapa küma tenzüktsüla kechiyong iba ya CCS nung shilem ka lir, ta paisa shisem.
CoSAAP-i 7th CPC allowances meshiba den külemi All India Medical Attendance Rule meyipa bener arutsü, aser state sorkar mapa inyakertem atema dang masü saka senso ajak asoshi NOC system mapa inyaktsü mesüra agientsü atema takhangbatem agütsür.
Sodi anogo aika anguba ajanga public, shishilembartem aser sendaktepa alirtemi timtem ajuruba angateta CoSAAP-i October 23 nungi 26 tashi lungkak aitba shilem tanabuba agitsü aliba nung inyakyim melenshiogo.
October 23 aser 24 anogotem mapa inyakertem ajaki office/mapa inyakdai aotsü saka tejashi sayua badge tanak khaloktsü.
Iba mapang sorkari telangzüba tajung magütsür mapa inyakertemi taoba mapang sangdonga aliba ama October 25 aser 26 anogotem pen/tools down movement agitsü, ta CoSAAP-i metetdaktsü.