Arunachal Congress-i public transport nung tetsür kümzüka ayutsü akhanger

Itanagar, Luroi (August) 19 (Agencies): Sahara Tour and Travels, Naharlagun indang cab driver kati Arunachal Pradesh yimtiba Itanagar nungi tetsür asem maaksütsüba aser amokmerenba atema Arunachal Pradesh Congress Committee (APCC)-i aitsü.
“Anogoshia tetsür dak tashiyim aser tim masüba mapa inyakba osang angashidang kanga jashir. Transport nung tetsür kümzüka ayutsüba ya tebilemtsü tulu ka kümogo. State sorkari public road transport nung tetsürtem kümzüka ayutsü atema mapa inyaktsüla” ta APCC otongdar Mina Toko-i ashi.
“Public road transport nung timtem agütsübaji tetsür nem maongka magütsüba ama lir aser parnok temeten aser nüjiso ajembanga ayur” ta paisa metetdaktsü.
State sorkari transport planning nung tetsürtem kümzüka ayutsü atema inyaktsüla. December 2011 nung tetsür ka dak tashiyim agi shi nung medemba sülen Centre sorkari public road transport nung tetsürtem kümzüka ayutsü atema mapa aika tenzükogo. Iba kasaji Meghalaya nunga inyaktsüla, ta Toko-isa shisem.
State sorkari tangsa tang tetsürtem atema ‘public road transport safety measures’ inyaktsüla. Sorkarisa public aser private transport operators dang passenger tem aser talisa tetsürtem kümzüka ayutsü atema telatetba kar yanglutsüla, ta APCC-isa takhangba agütsü.