Arunachal deputy CM-i Stilwell Road lapokdaktsünür

Guwahati, January 31 (Agencies): India sorkar indang Act East Policy ajanga Northeast asoshi temelenshi tulu bentsür arutsü ta Arunahcal Pradesh deputy chief minister Chowna Mein-i ashi.
Guwahati nung “Role of Tai Community on the Act East Policy border” indang shisatokden sentong ka nung jembidang Mein-i iba osang metetdaktsü.
NE state tem nung aliba Tai nungeri India aser ASEAN linüktem atema apu ama shilem shilem agitettsü akok, kechiyong tanga linüktem den alir sobaliba, chiyungtsü achiajemba aser oshitem mesüktepa lir, ta Mein-isa ashi.
ASEAN linüktem aser Northeast nunger sobaliba mesüktepba ya akangshitsüla aser iba ajanga asenok tesentaktep yanglutsüla, ta paisa ashi.
Mein-isa Centre dang China nung Kunming tashi Stilwell Road lapokshitsü atema mepishia metetdaktsütsü.
“India aser Myanmar arrtsü adena alirtem tsüngda külem sobaliba tesentaktep lir aser iba ajanga shishilembabaren jenjang ajungkettsü” ta Mein-i ashi.
Putiotsü nung kanga tongtipang lenmang Stilwell Road (Ledo Road ) ya World War II mapang yangluba liasü.
Iba lenmang ya Assam nung Ledo nungi tenzüker, Pangsau Pass (Nampong), Arunachal Pradesh adener Myanmar ajanga China kübok Kunming tashi lir.
Asenoki Stilwell road tanaben lapoktsü atema bilemtsüla kechiyong iba ajanga India aser Myanmar ajangzüktsü, ta Mein-i nenshia metetdaktsü.