Arunachal helicopter lendong nung asür tasümang ajak nguogo

Itanagar, August 12 (Agencies): August 04, 2015 nü Arunachal Pradesh, Tirap district nung Pawan Hans helicopter samaba sülen anogo tibuba nung High Altitude Warfare School (HAWS) nungi commando temi helicopter nung mena alir Tirap Deputy Commissioner, Kamlesh Kumar Joshi, pilot ana- MS Brar aser Rajeev Hoskote nunger tasümang Tirap district nung nguogo.
Osangbenertem den jembidang Director General of Police (DGP), S Nitithyanandam-i, tanü Jammu & Kashmir nung HAWS nungi training kanga junga agia alir commando tem tayimtsü nungi tenemkong nung tsükdaktsüba sülen Hombar nü tayimtsü teraksa anguba tesemji atong, ta ashi.
Tsüngsang-mopung kanga ajungba ajanga iba maparen takok nguogo, ta DGP-isa ashi.
Tasümangtemji nguaka tayimtsü ajanga Khonsa-i bener aotsü asoshi commando temji kanga kümdanga tetsüng agi jajadagi, ta Chief Secretary Ramesh Negi-i ashi.
Iba operation nung Tirap aser Changlang district ketdangsertem, Army, Assam Rifles aser police den IAF indang Ml-17, Cheetah helicopter tem, Sukhoi MKI30 aser EW Boeing helicopter tem amshia liasü.
Joshi kinüngtsü Neha aser adianu Major Rajesh Joshi nungerbo Aug. 6 nungi Khonsa nung monga liasü.
Tsüngsang mopung ajanga timtem aiben aludakjaka Hombar nü helicopter tebenlakji Sanfliam yimtsüng nungi kilometer 4-5 pilar aliba tesem ka nung angu, ta Civil aviation secretary, BM Mishra-i ashi.
August 4 anepdang 10:45 ako meta state meyong Pawan Hans helicopter ji Tirap district, Khonsa nungi apusoa liasü. Iba helicopter nungji Longding aser Changlang Deputy Commissioner anioksemer New Delhi-i oa August 6 nü tongtibang senden ka nung adentsü sentong liasü.