Arunachal-i Patkai autonomous development council akhanger

New Delhi, September 06 (Agencies): Tanü Deobar nü Arunachal Pradesh sorkari Centre sorkar dang, state nung mepetmesü aliba district asem- Tirap, Changlang aser Longding nung autonomous development council tentetjang ta takhangba ka agütsüogo.
Tanü Arunachal Pradesh Chief Minister, Nabam Tuki lenisüba nung item district asem nungi state minister aser MLA ajak den MP ana densema teshimtet telok kati Union Home Minister Rajnath Singh ajurua pa matsüngdang Patkai autonomous development council atema takhangbaji benokogo.
Home Minister Singh-i parnok dang takhangbaji Centre sorkari shisadangtsü ta shiogo, ta Arunachal Pradesh sorkar sangdong ka ajanga metetdaktsü.
Telungpurtemi kongshia aliba dictrict asem nung terenlok alitsü asoshi autonomous council ka nüngdakba indang kuli benokba mapang Tuki-i mapang talangka nungi Patkai autonomous district council atema takhangba agüja aruba indang ajak metetdaktsü.
Chief minister Tuki-i, state nüburtemi council ka atema mapang talangka nungi akhanger, talisa telungpurtemi maneni mapa inyaksangshiba ajanga loktiliba rongsenkettsüng jenjang majungba den terenlok agi anüngba item district asem nüburtemi akhanger, ta ashi.
Arunachal Pradesh anüdoklen tsütsü tezülen aliba tesem nung ya terenlok agütsütsüla; Iba tesem nung yimsüsüba aser terenlok nung tayongzükba tulu ajurua alibaji autonomous council ka tentetba ajanga kanga yaritsü, ta Tuki-isa ashi.
2004 küm aser 2007 küm state assembly nung Patkai Autonomous Council ka tentettsü atema takhangba agütsü asoshi agizüka liasü aser 2013 küm nunga Cabinet-i agizükogo.
Iba sülen temepishibaji Union Home Ministry aser iba takhangba reprangtsü atema UPA sorkari tentettsüba committee ka dangi yok. Iba committee jagi 2014 February ita nung dictrict asemji semdanga liasü.
Iba mapang nungjagi tenzüka Arunachal state-i akhangba dak sentakba nung Home Ministry nungi osang kecha maliasü, ta state sorkar sangdong ajangasa ashi.