Arunachal kaketshirtemi par litsü kümzüka ayutsü

Itanagar, September 02 (Agencies): Tawa Centre sorkar aser National Socialist Council of Nagaland (IM) na tsüngda Yimjung Tenangzüktep agiba dak sentakba nung All Arunachal Pradesh Students Union (AAPSU)-i Ato kilonser, Narendra Modi aser Union Home Minister for State, Kiren Rijiju ajurutsü lemtetogo.
Tanü Itanagar, Press Club of Arunachal nung osangbenertemn den jembidang AAPSU Tir Kamta Lapung-i, “Northeast state tem tsüngda yimjung alitsü inyakyim mesüra telungpur telok shinga anema onoki menoktaker, saka onoki India sorkar telemtetbaji pela agizüker, ajisüaka Greater Nagaland atema ozü litsü inch kata agütsütsüji onoki khenyongi memulungtsü, kechiyong iba Tenangzüktepji northeast state tem nung Arunachal Pradesh ama den angatettepa inyak masü,” ta ashi.
Paisa, AAPSU nungi telok kati Arunachal Chief Minister Nabam Tuki bo ajurua memorandum ka nung iba onük nung Party ajak senden ayongzüktsü mepishiogo, ta ashi.
“Sendaka aliba state tem den mangatettepi India sorkari telemtetba agibaji khenyongi tagizüktetla masü, itemji ken o junga jembiba ajanga dang latettsü,” ta Lapung-isa ashi.
“Tawa Naga Yimjung Tenangzüktep ajanga, NSCN kanga active süa aliba Tirap, Changlang aser Longding (TCL) district nüburtem mulungjang nung tetsübu aitogo,” ta APPSU General Secretary, Biru Nasi-i ashi.
“Onoki Yimjung maparenji pusemer, saka TCL (Tirap, Changlang aser Longding) ya Arunachal shilem lir aser ozü litsü nungbo onoki kecha jenjang nunga atsü-anem masütsü,” ta paisa ashi.
AAPSU otongdar Tanya Agu-i, Ato kilonser Narendra Modi aser Rijiju dak alia parnoki Naga Yimten ken o atema tiyongtsü nung jembisang R N Ravi-ia ajurutsü, ta ashi.