Arunachal kübok district 3 nung maneni ASFPA benoker

Guwahati, Rongchii/April 2 (Agencies): Centre-i Hombarnü Arunachal Pradesh kübok district asem nung maneni Armed Forces (Special Powers) Act (AFSPA) ita trok atema benoka atatsü telemtetba agiogo.
District asem ya Tirap, Changlang aser Longding lir, ta osang ka ajanga metetdaktsü.
Ajisüaka ‘disturbed area’ ta nüngja agütsür aliba state kübok district asem nungibo angiogo.
AFSPA kübok “disturbed area” ta nüngja agütsür aliba ya march 31 nü tembangtsü liasü aser iba masüdang Arunachal kübok item district trok nung nung temzüng ozüng tsütsü tensa asadanger tang iba telemtetba ya agiogo.
District trok asadangba sülen asem nung temzüng ozüng tsütsü tensa mejungi aliba asateta maneni iba ozüng benoka atatsü telemtetba agi.
Maneni home ministry-i AFSPA, Section 3 kübok police stations pezü temeket nung aliba tesemtem maneni ‘disturbed area’ küboki aitdaktsütsü telemtetba agi.
Police station pezü rongnung Namsai district nung Namsai aser Mahadevpur police stations, Lohit district nung Lower Dibang Valley district Roing aser Sunpara densema lir.
Kasa mapang nung West Kameng district kübok Balemu aser Balukpong PS, East Kameng district nung Seijosa aser Papumpare district nung Balijan PS tem ‘disturbed area’ küboki maitdaktsütsü telemtetba agi.
AFSPA ya armed forces teyari nüngdaka aliba tesemtem nung benoker. Ajisüaka tesem ka “disturbed area” küboki aidaktsütsü atema 1958 Act, Section 3 dak ajemdaker state mesera Central sorkari sangdongtsüla.
Armed Forces (Special Powers) Act, 1958, section 3 kübok tashi agüja aliba dak ajemdaker Union Home Ministry-i tang iba telemtetba ya agiogo.